Carnaval Carnaval, ay ki dushi ta Carnaval.
Awe ami MOMITO, e yui mas inteligente di Rey Momo , Primo di e reinanan , Tio di nos prins cu panchonan , Rey di caminda ta cla pa duna su testament pa Carnaval 69.
Aki mi kier a duna algun punto cu mi ta desea pa nos traha riba dje pa hunto nos crece un biaha mas e Carnaval di nos muchanan.
Carnaval ta Bida
E mesun bida aki Momito ta desea di mira bek den nos Parada di Muchanan, nan Inocencia, nan sonrisa, nan alegria mester ta nos motivacion di cada dia. Carnaval ta gozo y divercion, ta momento pa nos tuma accion pa duna Carnaval di Mucha proteccion.
Harimento ta parti di Bida
Momito ta desea di mira mas participacion di Prins cu Pancho. San nicolaas, Savaneta, Noord, Dakota y asta Rancho. Na docentenan mi kier a pidi boso pa motiva nos muchanan, ban trece e arte di conta chasco bek, e ta algo masha pret.
Participacion ta yena tur nos cu emocion.
Momito su curason lo ta yena di Felicidad si otro aña mas reina competi. Skolnan, Club, Centro di Bario y Fundacion, ban traha hunto pa yega na un solucion. Nos tin hopi hende talentoso y cu ta haci cu e participacion no mester ta mucho costoso.
Shon Kriticonchi tin hopi … Think Twice before your click
Hopi critika Momito a lesa y skucha e aña aki. Esaki ta haci Momito su curason bira tristo y chiquito. Enbez di sinta critika un ta mas mihor lora manga y cuminsa aporta na nos celebracion. Ban uni como un gran nacion pa sigui mustra mundo con nos ta sigui cu nos tradicion. Yuda y duna bo aporte nan nos futuro generacion.
Musica ta alegria
Momito ta contento y a baila masha hopi riba e musica di nos tumberitonan y tambe nos Calypso y Roadmarch.
Mi a baila e Baby Smoke Stoke, Mi a Break Away na ordo , y mi a corda semper cu The Show Must Go On y rato rato ora mi pianan a cansa poco mi a yama 911. Ora e tumba dushi a dalmi mi a subi e Trein di Ambiente y mi a sintimi den Salon di Fama. Muchanan sigui canta y engradece nos Carnaval
Un conseho semper ta na su lugar
Na Mami y Papi un peticion di curason , Momito ta desea pa pidi boso duna mas atencion ora di tuma un decision.
Momito so wowonan a bira cuadra di mira muchanan den Jouve .. NO POR. Sin proteccion di orea … ROBES
Sin proteccion conta solo… Ta KICO TA PASA DEN BO CABES. Nan mester awa pa hidrata mas mes. Nos muchanan tin derecho riba cuido y proteccion , abo como mayor please tuma e mihor accion.
Educacion parti fundamental di nos nos desaroyo.
Un movemento positivo cu Momito a tuma nota di dje ta e jump up nan escolar den barrio cual ta duna nos muchanan e oportunidad di por diberti y tambe jump den un parada. Mi kier a motiva e skolnan pa sigui haci esakinan. Lo ta great pa Carnaval 70 mas skol uni hunto y asina por join tambe e paradanan principal di Carnaval.
Carnaval ta di Aruba , tur barrio uni pa un Carnaval por sigui crese.
Momito kier a duna un felicitacion special na e team di Noord cu aña aden aña afo ta lucha pa nan parada sigui, cu nan elleccion di reina y cu nan participacion activo den nos Carnaval, esaki ta un bon ehempel pa otro districtonan na Aruba, nos por haci nos Carnaval e fiesta mas grandi di pueblo.
Mejoracion ta e clave di Superacion
Momito ta conciente cu tin cosnan pa mejora, ya caba mi a laga mi lista atras pa Mr.Cocoliso ( Ay Dios no ta prins cu Pancho esaki ta ) Mi kiermin cu Mr. Darren pa asina hunto cu e team di SMAC pa traha pa nos Carnaval di Mucha por sigui engrandece
Na tur nos muchanan y hobennan, auque momito ta bai, corda sigui represente Carnaval durante henter e aña , unda cu boso bai saka cara di nos nos muchanan y hobennen. Dyshell, Aiden, Lucas, Shaqion, Ziah Amalia, Jennely , Carl Anthony, Caylee, Carl Jr, Zenae, y Jorienne y tur participante… Danki pa boso presentacion radiante, mi ta desea boso un mundo briyante.
Mi sa cu pronto mi ta wordo kima pero mi ta bai laga boso cu e promesa cu otro aña lo mi renace atrobe manera un Ave Phoenix pa ta e guia y protector di nos mucha y hobennan.
Danki na tur esnan cu a traha pa nos Carnaval.
SMAC cu ta e organisador principal, Shon Polis , Ambulance, Cuido di Emergencia, Musico, Decorador, Costurera, tur tur tur persona cu ta yuda den e celebracion aki. Ban traha den union pa Carnaval 70, unda nos lo hisa benta y nos lo sigui celebra teniendo nos muchanan bon na cuenta.
