Movementu Kousa Promé ta tuma nota di e situashon alarmante ku a bin ta tuma lugá
riba nos teritorio, esta e militarisashon di nos pais. Mas i mas por ripará kon Hulanda i
su aliadonan di NATO ta intensifiká nan operashon militar riba nos teritorio. A bin ta
amplia e kantidat di base militar riba nos isla; un base hulandes na Wakawa i plannan
avansá pa amplia presensia merikano riba seru di Arrarat. Tambe tin moveshonnan
militar konstante na Koral Tabak.
Na 2022 Hulanda a stashoná 2 MQ-9 Reaper-drones na base di FOL na Hato. Ta trata
di un tipo di avion sin tripulante ku ta eksplorá i opservá pa oranan largu riba laman i
riba tera. Nan tin kapasidat pa kolektá dato i kombertí nan den informashon. E
dronenan aki tin kapasidat pa ehekutá atake. Nan ta keda dirigí for di Hulanda.
Un mayoria den Tweede Kamer a ekspresá ku nan lo ke pa ekipá e dronenan aki ku
arma i asina kombertí nan den drone pa mata hende i destruí propiedat.
Piskadónan ku pa hopi aña ta piska den e awanan na Wakawa mester a hiba un lucha
pa nan derechi di por gana nan pan di kada dia honradamente. Militarnan tin tiramentu
kasi tur dia den e área di Wakawa. Piskadónan di Wakawa a bandoná piskamentu òf a
bai piska otro kaminda pa evitá peliger.
Resientemente miembro di Tweede Kamer Boris Dittrich di D66 a bin ku sugerensia pa
embolbí Aruba i Kòrsou den industria militar hulandes, komo produktor di arma i
munishon. Di tal manera e islanan por haña kòntraktnan di Defensa i bira depósito pa
uso militar. Minister di Defensa Brekelmans a simpatisá mesora ku e idea di Dittrich
poniendo esaki den kuadro di “menasa i turbulensia di pais bisiña Venezuela”. El a
enfatisá e importansia stratégiko di e islanan den e konteksto aki. Aruba i Kòrsou lo
haña un ròl mas fuerte den polítika di defensa hulandes. Gobièrnu hulandes lo sigui
diskutí e asuntu i realisá un estudio di faktibilidat.
Otro situashon di atenshon ta deklarashon di Donald Trump den su kalidat di
presidente. Trump ta mira Venezuela komo un desorden peligroso ku mester atendé
kuné. El a ekpresá ku tin yen di opshon i no mester ekskluí un operashon militar
Konsiderando ku:
NATO ta e mákina di guera pa Trump
Merka i su aliadonan den NATO ta fomentá guera i blokeo tur kaminda na
mundu;
E gueranan ku NATO ta orkestrá tin un meta i interes ekonómiko;
Ku aktualmente Hulanda ta na kabes di NATO;
Kòrsou ta den porta di Venezuela;
Kòrsou ta propiedat di Hulanda;
Pa motibu di tur e konsiderashonnan aki i tambe pa e echo ku Kòrsou ta pertenesé na e
zona di pas di Caribe i ku Kòrsou komo un pais di pas no ta drenta guera ku niun pais,
Movementu Kousa Promé ta urgí bo persona komo minister presidente di Kòrsou pa:
Bo gobièrnu protehá Kòrsou i hasi tur loke ta posibel pa Hulanda, Merka i nan
aliadonan di NATO no embolbí Kòrsou komo base den nan polítika di defensa, ni komo
industria di arma, ni komo depósito di arma i munishon, ni komo kampo di bataya den
guera ku niun pais.
Kòrsou ta un pais ku no ta provoká guera i ku no mester di base militar. Tin un Karta
Magno di Caribe kaminda pueblonan di Caribe a hura ku otro ku ta mantené Caribe
komo Zona di Pas. No ta ataká otro i lo biba ku otro den harmonia i pas. Kòrsou mester
tene su mes na e kombenio aki i rechasá tur violensia i agreshon militar riba su suela i
via su suela. Kòrsou mester keda e isla dushi i amabel manera semper.
Nos ta gradisí Su Ekselensia i ta terminá den espera di un reakshon pronto i pasonan
konkreto pa salbaguardiá nos teritorio di guera.
Movementu Kousa Promé
Drs. Ellen Maduro-Jeandor Dr. René Rosalia
Presidente Lider polítiko
Mov. Kousa Promé Mov. Kousa Promé
