Tin tension bou di miembronan di Arubaanse Voetbal Bond (AVB). Tin hopi cos bayendo fout cu e clubnan miembro kier contesta riba dje.
Pero e mas urgente ta peticion di clubnan pa pospone un reunion yama pa awe nochi 7’or. Un reunion cu pa colmo na momento cu seleccion di futbol di Aruba ta hungando un wega importante internacionalmente.
Segun por a compronde, a haci peticion na e presidente di AVB pa pospone e encuentro importante aki pa otro fecha. Sinembargo nan a haya un no categorico. Ki ta e miedo di e presidente pa pospone e reunion no ta conosi ainda.
E miedo di e clubnan cu door cu Aruba ta hunga awe nochi, no tin mucho interes pa e club. Di e forma aki ta aproba relato financiero sin mucho cuestionamento y tuma otro decision cu lo no tin deliberacion y discusion riba nan.
Informacion cu nos ta dispone di dje ta cu e clubnan miembro ya caba a cuminsa mustra nan malcontento riba Facebook, cu nan no ta haya atencion di e presidente. Tin hopi cuestionamento riba su maneho, pero principalmente riba e parti financiero. E miembronan kier expresa nan preocupacion, pero nan ta sinti cu esnan cu acudi na e reunion lo no ta completamente concentra pa motibo di ta pendiente di con e seleccion di Aruba ta actuando den su wega internacional.
E preocupacion ta cu si solamente dos miembro acudi, e reunion por sigui toch cu e minimo y esaki ta loke cu e otro clubnan no kier. Nan ta prefera un fecha riba cual tur miembro ta presente, cu suficiente tempo pa papia riba tur nan preocupacionnan