Un team ta trahando duro na biblioteca riba un otro edicion di su Festival di Buki pa Mucha. E tema di e festival 2020 ta ‘Historia’ cu su lema ‘Tempo di mi tempo’. Durante Festival di Buki pa Mucha 2020 muchanan ta bay bek den pasado pa descubri e mundo di antes. E aña aki e festival cu ta tuma lugar den prome siman di november ta bay ta un poco diferente. Actualmente diferente presentacion ta wordo graba den Studio di biblioteca. Esaki pasobra bishita na scol ta poco limita. Den Studio di biblioteca ta prepara e presentacion di autor di buki pa mucha y tambe ilustrador.
Biblioteca a laga produci un buki special pa e siman cohuntamente cu Levendig Uitgeverij na Hulanda. Esaki ta un compilacion di storia. Scolnan participante ta haya e buki gratis. E buki a keda bunita ilustra pa e conocido artista visual, Elvis Tromp. Elvis a keda inspira pa e tema ‘Historia’ y a pinta un ilustracion pa cada storia. Elvis ta prepara un presentacion pa duna muchanan e sabor di pintamento. Riba website di biblioteca por lesa mas di Elvis Tromp. (Insert link) Un di e ilustracionnan di Elvis a bira logo pa e festival. Claro cu tin un cantica pa e festival canta pa Ambar Silva, Ces Sy y Ryah Sy, titula ‘Lesa y lo bo wak’. Musica a keda produci pa Mario Chow, Sergio Silva y Jeremy Bonarriba, letra ta di Sergio Silva y Arreglo musical ta di Jeremy Bonarriba. E grabacion y mezcla a wordo haci den Sunny Ray Studio.
E interes pa e festival semper ta grandi di parti di e scolnan na Aruba. Pa entusiasma y inspira docentenan, biblioteca ta prepara un tayer. Esaki lo bay online. Durante e tayer docentenan ta haya guia con pa traha cu e tema y hopi tips di buki cu por lesa pa e muchanan den klas. Cu e lema ‘Tempo di mi tempo…’ biblioteca ta kick-off e promocion pa su Festival di Buki pa Mucha 2020.
