#ItsInOurNature
Tourism Corporation Bonaire (TCB) ta kontentu di por anunsiá firmamentu di un Memorandum of Understanding (MOU) ku Davidlee Winklaar, ku kua ta design’é komo un Profeshonal i Embahador Lokal prominente di nos isla. E kolaborashon akí ta un logro importante den promoshon di Boneiru su identidat propio, su kultura riku i su impreshonante bunitesa natural.
E akuerdo ofisial akí ta nifiká un kolaborashon sostenibel durante hopi aña pa fiha atenshon riba Boneiru su naturalesa úniko. Ta bai logra esaki pa medio di un variedat grandi di inisiativa, kompetensia, evento, proyekto i na promé lugá pa medio di e pashon sinsero ku Davidlee Winklaar tin pa nos isla.
Davidlee no solamente ta un persona dediká i pashoná, pero tambe un atleta ku un bèkgrount fuerte den arte marsial. Den kurso di su trayektorio den atletismo el a akumulá un lista impreshonante di prestashon, manera ganamentu di e título mas haltu na México durante e kampionato di WAKO Pan American na aña 2018, demostrando asina su dedikashon, disiplina i talento insesante.
Resientemente el a anunsiá su kòmbèk atlétiko bou di e título ‘The last dance’ ku e meta pa partisipá na e Kampionato Pan Amerikano na Brasil.
Aktualmente Davidlee ta den preparashon pa representá Boneiru na e Kampionato Pan Amerikano ku lo tuma lugá den luna di desèmber 2023 na Brasil. Su partisipashon na e evento internashonal akí ta suprayá su dedikashon pa trese rekonosementu i honor pa nos isla.
E kolaborashon entre TCB i e bonerianonan akí ku ta destakando ekselentemente, ta nifiká un dedikashon kompartí pa pone Boneiru su kultura úniko, su deporte i su talentonan eksepshonal den spòtlait riba esenario mundial. Huntu nos ta aspirá pa duna un aporte signifikante na kresementu i reputashon di nos isla den e ámbito internashonal.
