Tourism Corporation Bonaire (TCB) a lansa su investigashon di inventarisashon di kamber di kada dos aña pa optené informashon balioso pa loke ta trata kresementu i desaroyo di industria di turismo na nos isla. E investigashon ta intenshoná pa duna sosten na e metanan turístiko di e industria i na mes momentu duna input balioso ku tur stakeholder tin benefisio di dje.
Komo parti di e investigashon TCB ta invitá tur operador, doño i mènedjer di nos hotèlnan i otro akomodashonnan/stakeholdernan pa partisipá na e investigashon di inventarisashon di kamber i pa duna informashon konfidensial tokante e kantidat di kamber i tokante kresementu i kambionan na nos isla, inkluso e prestashonnan di e 12 lunanan tras di lomba.
Lo usa e informashon akí pa determiná e situashon aktual di e sektor. “Inventarisashon ta un instrumento esensial pa haña un bista den e estado aktual di e industria di turismo na Boneiru”, segun direktor di TCB, Miles Mercera. “Pa medio di ehekushon di e investigashon akí, nos por haña informashon balioso pa loke ta trata e potensial di kresementu di e sektor i nos por identifiká áreanan kaminda mehorashon por ta nesesario. Nos ta enkurashá tur stakeholder pa partisipá na e investigashon pa asina sostené kresementu duradero di industria di turismo na nos isla.’
E resultadonan lo sostené e strategianan di merkadeo di e sektor i dunamentu di servisio di kalidat na nos bishitantenan.
TCB a ehekutá e último inventarisashon na aña 2021 i awor akí gustosamente ke haña e datonan mas resien pa por tuma desishonnan bon balansá.
Pa mas informashon tokante e investigashon di inventarisashon di kamber òf pa partisipá na e investigashon, bo por tuma kontakto ku TCB via marketing@bonaireisland.com