Perspektivanan positivo pa wenter 2022/2023
Tourism Corporation Bonaire, den kolaborashon ku e eksperto di data ForwardKeys, a kompartí e último informashonnan di biahe ku nan ta verwagt pa wenter di 2022/2023, a base di e pasashinan realmente reservá pa Boneiru. Despues di Covid Boneiru a mira un rekuperashon konstante i awor ta atraé tiponan nobo di biahero komo konsekuensia di e strategia di diferensiashon nobo implementá.
E perspektivanan di buelo pa Boneiru ta stabil ku un grado di okupashon promedio di mas ku 80% pa e di kuater kuartal di aña 2022. For di desèmber ta bini buelonan diario atrobe for di Miami ku American Airlines, 5 buelo pa siman for di Atlanta ku Delta i e buelo for di Newark ku United tambe ta bini bèk pa kumpli ku e volúmen mas grandi di pasahero ku nan ta verwagt pa e temporada di biahe den wenter di 2022/2023.
‘Tantu e área karibense komo Boneiru no solamente ta bon ehèmpelnan di kon bon un region ta rekuperá, pero tambe di un region ku ta rekuperando, no opstante tur faktor makro ekonómiko ku ta tumando lugá awor akí, manera ekonomia mundial ku ta drai mas pokopoko, gastu di gasolin ku ta oumentando i e efektonan di e guera na Ukraina’, segun Oliver Ponti, Vice President of Insights na ForwardKeys.
Den e di kuater kuartal den hopi pais e kantidat di turista ta oumentá mas rápido. República Dominicana ta kana dilanti riba tereno di yegadanan ku ta krusa laman, 40% mas tantu ku na aña 2019, siguí pa US Virgin Islands – 33% mas tantu, Boneiru – 30% mas tantu i Martinique – 26 % mas tantu.
Boneiru ta eksperensiando un kresementu den e kategoria di biaheronan premium a base di un oumento di biaheronan riku di klase premium, merkadonan variá pa loke ta trata prosedensia (Nortamérika, Oropa i Latinoamérika) i ophetivonan di biahe.
Den e di tres kuartal biahenan premium ku avion pa área karibense a oumentá ku 27% kompará ku e periodo promé ku e pandemia. Pa loke ta trata biahenan premium ku avion pa Boneiru nos por mira spesífikamente un oumento di tres sifra kompará ku e nivel di aña 2019, esta 110% mas haltu. Esaki ta grandioso i spesialmente un bon notisia, no solamente pa e kompanianan di aviashon i hotèlnan, pero tambe pa e sektornan di benta di produkto i servisio.
‘Esaki ta un resultado eksakto di nos Plan di Rekuperashon pa Turismo i nos strategia pa alkansá e biahero pudiente ku ta en buska di un eksperensia di vakansi eko-konsiente. Turismo ta hunga un ròl importante den nos rekuperashon ekonómiko i e datonan i konklushonnan akí ta forma nos guia ora nos ta plania’, segun Miles Mercera, direktor di Tourism Corporation Bonaire.
Tokante ForwardKeys
Na aña 2010 nan a funda Forward Keys a base di e pensamentu ku empresanan ku ta dependé di biaheronan internashonal – manera organisashonnan turístiko, hotèlnan i komèrsio por menor – lo tuma mihó desishonnan stratégiko si nan sa ken ta biaha bai unda, ki dia nan ta biaha i durante kuantu tempu nan ta biaha. Pa e motibu akí e kompania ku e fundadónan mes a finansiá a desaroyá e database di mas amplio di reservashon pa biahe ku avion den e sektor, ku informashon detayá tokante profil di biahero. Durante e último añanan e kompania a desaroyá i bira un spesialista riba tereno di informashon di biahe, ku no solamente por ofresé bo konosementu tokante fluho di biaheronan internashonal, pero tambe tokante nan komportashon i preferensianan na nan destinashon.