Tourism Corporation Bonaire (TCB) konhuntamente ku gobièrnu di Boneiru i Indebon a duna homenahe i rekonosementu na Gyairon Martis komo embahador di Boneiru. Gyairon Martis, un hóben deportista multitalentoso, nasé na Boneiru dia 22 di yanüari 2000, a keda honrá i rekonosé pa su tremendo prestashon den e mundu deportivo. Gyairon ta un deportista ku a praktiká diferente deporte manera beisbòl, sòftbòl, pinpòn i tambe biar. Na edat hóben Gio manera nan ta yam’é, a kuminsá praktiká beisbòl ku apenas 4 aña di edat. Gio a forma parti tambe den selekshon di Little League hungando kontra paisnan manera Kòrsou, Puerto Rico i Santo Domingo.
Den sòftbòl Gio a hunga den ekipo di Energizer, na unda na aña 2019 nan a titulá kampion di e torneo ‘Harma Bini Aden’. Ku 14 aña Gio a kuminsá praktiká pinpòn na Jong Bonaire. Su logronan praktikando e deporte akí tabata Kampion Ranking U-15 i di dos lugá den duo ku Leogino Melaan den klase U-15 i U-18.
Gio a praktiká biar tambe ku su 8 aña di edat. Diferente persona ku a yuda Gio den e deporte akí tabata Jimmy i Gregory Frans i tambe Randolf Cicilia. Su tata Aaron Martis ku a mira e interes ku Gio tabatin pa biar, a kumpra un mesa profeshonal pone na kas pa Gio por a praktiká. Biar a hasi Gio un deportista internashonal, na unda el a partisipá den diferente kampionato Pan-Amerikano den Bola 9, pero tambe den ‘pool’ 8, 9 i 10 na diferente pais manera Colombia, Shanghai – China i Rusia.
Na aña 2018 Gio a bai sigui ku su estudio na Hulanda i a terminá esaki ku éksito. Na luna di novèmber 2022 Gio a bai dediká su mes atrobe na su deporte preferí ku ta biar, i akí tabata e momentu ku doño di e ekipo The Hague 51, Staaf Verharen su bista a kai riba Gio, mirando e talento i pashon ku e tabata desplegá riba mesa di biar. Gio a hasi su debut na Hulanda den Divishon di Honor ku su ekipo The Hague 51. E ekipo akí ta konosí pa diferente biarista famá na Hulanda i tambe mundialmente. Den e divishon akí tambe Gio a destaká i a gana su promé dos weganan.
TCB, gobièrnu di Boneiru i Indebon ta gradisí Gyairon pa su kontribushon balioso pa mantené Boneiru su nòmber na haltu riba nivel internashonal i ta rekonosé Gyairon komo embahador di Boneiru.
