Pa konmemorá Dia Mundial di Awa, Tourism Corporation Bonaire (TCB), Bonaire Hotel and Tourism Association (BONHATA) i Water- en Energiebedrijf Bonaire (WEB) konhuntamente ta lansa e proyekto di Bonaire Water Bottle.
E aña akí Dia Mundial di Awa ta bai tokante akselerashon di kambio pa solushoná e krísis di awa i sanitario. Mundialmente kada minüt nan ta kumpra mas ku 1 mion bòter di plèstik i kasi 80% di esakinan ta resultá riba lèntfel i den oséano. Ku e velosidat akí e kantidat di plèstik pa un solo uso ku ta resultá den nos oséanonan, na aña 2050 lo ta mas tantu ku e kantidat di piská, a ménos ku nos trese kambio den esaki.
Komo parti di e Plan di Rekuperashon di Turismo, un di e metanan ta pa engrandesé e insentivonan kontinuo na nos isla pa sostené Boneiru su esfuersonan sostenibel. Tin vários inisiativa na nos isla ku ta kana den bon direkshon. Nos tambe ta mira e balor di forma parti di e moveshon positivo akí.
E meta mas importante di e proyekto di Bonaire Water Bottle ta pa krea konsiensia relashoná ku tene Boneiru liber di kontaminashon ku plèstik i pa keda promové bòter di awa reusabel serka nos komunidat i nos bishitantenan. Banda di esaki krea konsientisashon tokante bebe awa di kranchi di Boneiru na un manera seif i keda hidratá durante dia. Den e forma akí Boneiru ta kontribuí tambe na e Ophetivonan Sostenibel di Desaroyo di Nashonnan Uní. Finalmente nos bishitantenan por bai ku un bunita suvenir tambe di Boneiru ku nan por usa tur kaminda na mundu.
Huntu nos ke traha riba un Boneiru mas sostenibel i konservá nos naturalesa pa e generashonnan despues di nos. Ta importante pa kuida nos naturalesa, di manera ku e por hasi algu bèk pa nos. Konektá hende ku naturalesa ta forma parti di ken nos ta i na Boneiru nos ta hasi esfuerso pa uso sostenibel di e rekursonan di oséano. Pa e motibu akí nos tin ku tene nos isla i nos oséano limpi i e proyekto di Bonaire Water Bottle ta un tremendo forma pa kontribuí na un isla limpi.
Aña pasá den kuadro di Dia di Mama Tera, TCB a lansa e kampaña di ‘The Bonaire Bond’. Esaki ta un promesa di destinashon ku ta invitá bishitantenan pa firma un promesa ku nan ta biaha na un manera responsabel pa konservá e forsa natural di atrakshon di Boneiru pa e añanan binidero. E proyekto di Bonaire Water Bottle ta komplementá e Bonaire Bond den un forma hopi bunita i ta hasi su balor mas grandi. Huntu nos por akselerá e kambio akí. Pa e motibu akí nos ta enkurashá nos bishitantenan pa firma e Bonaire Bond riba www.bonaireisland.com i bira un parti integral di preservashon di nos laso ku medio ambiente, ku nos identidat úniko i ku otro.
Tokante e bòter di awa
Pa e proyekto akí e organisashonnan ta traha huntu ku Fundashon D-TAP. Nan ta sòru pa un konekshon duradero entre tur partner i tur stakeholder na nos isla, ku e Ophetivonan Sostenibel di Desaroyo komo kompas. E bòter di stal inoksidabel ta reusabel, sostenibel i ku un bunita diseño ku e mensahe: ‘100% ocean water from the tap – 100% awa di oséano for di kranchi’. Kada bòter tin dos QR-code, un riba e tapa ku bo por skèn i haña e sitionan kaminda bo por haña awa di kranchi i un QR-code riba e bòter mes, kaminda bo por haña mas informashon tokante Boneiru i e Bonaire Bond. Ademas e bòternan tin dos tipo di diseño, un ku ta enfoká riba nos bida bou di laman i un ku ta enfoká riba nos flora i founa riba tera.
Un súplika ta bai na nos komunidat i nos bishitantenan pa no lubidá di kontinuamente skohe pa uso di un bòter di awa reusabel i di e manera akí forma parti di e kambio. Dentro di poko e bòternan lo ta na benta.
I nos ta pidi tur partner ku ta interesá pa forma parti di e tremendo proyekto akí i bira un punto kaminda por yena e bòter di nobo, pa tuma kontakto ku marketing@bonaireisland.com i office@bonhata.org pa mas informashon.
