.Métodonan di restorashon di ref di koral ta dunando resultadonan prometedor den sosten di intentonan regional pa restorá refnan di koral deteriorá na Hulanda Karibense. Ku e meta akí Dutch Caribbean Nature Alliance (DCNA) ta organisá un tayer di restorashon di ref bou di guia di Hogeschool Van Hall Larenstein (VHL) riba 5 ku 6 di aprel na Saba. Na e tayer lo partisipá biólogonan di ref di koral, ekspertonan di restorashon di koral i managernan di parkenan marino di diferente isla karibense pa nan enfoká pa di promé biaha riba restorashon di un di e figuranan klave i importante riba ref– Diadema antillarum, – e seapel ku spiña largu.
Importansia di seapel Diadema
Refnan di koral saludabel ta esensial komo ku nan ta un magnet pa turista i na mes momentu un di e fuentenan di entrada mas importante pa Karibe Hulandes. Seapel ku spiña largu (nòmber sientífiko Diadema antillarum) tin un funshon importante den mantenshon di refnan di koral saludabel. Nan ta yuda sostené e balansa delikado denter di e ref dor ku nan ta kome alga, ku ta un di e kompetidornan prinsipal di koralnan. Desgrasiadamente, den medio di añanan1980, un malesa a skeiru rònt dor di Karibe, kabando ku kasi e populashon kompleto di seapel. Pronto despues, tabata dokumentá reportahenan di kresementu rápido di alga rònt di Karibe. E alga tabata okupá tur e espasio disponibel, preveniendo rekluta di koral i limitando e abilidat di ref di koral pa rekuperá di otro estorbo. Te ku awor, rekuperashon di e populashon di seapel D. antillarum a tuma lugá hopi poko poko te no eksistente. Den e tiki áreanan kaminda seapelnan a logra di rekuperá di forma natural, e tendensianan akí a kohe un rumbo kontrario, enfatisando riba e importansia di restorashon di e espesienan klave akí.
Tayer enfoká
Den e proyekto RAAK Pro Diadema VHL ta traha den forma estrecho huntu ku otro institutonan di investigashon i partnernan lokal pa restorá e populashon di seapel ku spiña largu riba e refnan di koral rònt di Saba i Statia. E proyekto akí ta dunando resultadonan prometedor. E investigadornan na kabes Alwin Hylkema i Tom Wijers lo kompartí nan hèrmèntnan, téknikanan i e deskubrimentunan mas resien pa fasilitá restorashon di Diadema den e region di Karibe Amplio durante e tayer di DCNA.
E tayer lo konsentrá riba e konteksto históriko i e status di e hèrbívornan redusí akí i introdusí téknika di restorashon di Diadema ku a duna resultadonan prometedor. Tambe riba e agènda tin seshonnan di entrenamentu den práktika, pa mehorá abilidatnan práktiko relashoná ku restorashon di Diadema. Tambe lo tin atenshon pa e eventonan di morto i desaparishon di Diadema den Karibe i un update di e deskubrimentunan mas resien. Lo ta posibel pa sigui algun di e seshonnan online pa personanan kende ta traha riba e tereno akí i no por a atendé na e tayer en persona.
Durante e dianan, lo tin diálogonan intenso entre e islanan pa interkambiá nan konosementu lokal, kompartí ekspertisio, stimulá koperashon kaminda ku esaki ta posibel i desvelá hèrmèntnan nesesario pa suavisá e pèrdida di seapelnan Diadema.
Outor di kambio den Restorashon di Ref
Restorashon di ref den Hulanda Karibense tabata fuertemente enfoká riba koralnan. E tayer akí ta basá riba investigashon i inovashon ku ta introdusí e restorashon di Diadema, e komedó importante di alga. Dor di restorá komedónan di alga huntu ku koralnan, e koralnan lo tin un grado di chèns mas haltu di sobrebibí. E seapel ku spiña largu ta kome i kita e alganan, ku ta un kompetidor importante pa e koralnan. Dor di krea un supstrato of un base limpi (sin alga), e seapelnan ta fomentá tambe rekluta natural di koral.
Salbaguardiá Refnan di Koral
DCNA ta hasi esfuerso pa salbaguardiá naturalesa, inkluso e refnan di koral ekstraordinario den Karibe Hulandes. Menasanan signifikante lokal ku mester atendé ku nan pa salbaguardiá e refnan di koral ta enserá desaroyo di áreanan na kosta ku malamente regulá, awa di kloaka i maneho di shushi i tambe komementu eksesivo di mata. Ademas, e falta di fondo duradero i e sosten di maneho ta stroba maneho di konservashon.
Riba esaki, restorashon di ref di koral ta un komponente importante. Tantu restorashon di koral komo di seapel Diadema por asistí den salbaguardiá e refnan di koral importante pero frágil i hasi nan mas fleksibel pa e impaktonan di kambio di klima.
E tayer akí a haña sosten generoso di parti di Ministerio di Agrikultura, Naturalesa i Kalidat di Kuminda (LNV) komo un sosten di e Plan di Maneho pa Naturalesa i Medio Ambiente pa e islanan BES, Postcode Loterij Nederland i SIA, un parti di Nederlands Wetenschappelijk Onderzoek (NWO).
Keda bon na altura
Si bo ke haña sa mas tokante e tayer di Diadema i di DCNA su aktividatnan, sigui informashon di DCNA pa medio di nan boletin di notisia grátis BioNews (https://dcnanature.org/news/), Facebook (Dutch Caribbean Nature Alliance) òf Instagram (DCNAnature). Pa mas informashon tokante e proyekto RAAK PRO Diadema bishitá https://www.facebook.com/reefrestorationVHL/ òf tuma kontakto ku lider di proyekto alwin.hylkema@hvhl.nl.
