Recientemente Heart-Centered Leadership Foundation (HCLF) a organisa un tayer titula
“Sembrando Simia di Crecemento Personal”. E tayer tabata un un exito absoluto,
alimentando mente y alma di e participantenan cu ta forma parti di e club hubenil di e
fundacion. E actividad aki a uni un grupo di hobennan vibrante cu ta desea pa explora
retonan di descrubrimento personal y di creatividad propio.
E atardi tabata un reunion di mente hoben y vibrante, arma cu cuashi y pochi di klei, cla pa
cuminsa un trayecto di transformacion. Durante e tayer, hobennan a haya e oportunidad pa
pinta pochi, sembra simia y expresa nan aspiracionnan. Bou guia di HCLF su trahado hubenil
y di boluntario Monica Franken, e hobennan a siña lesnan valioso di pasenshi, resiliencia y
“mindfulness”. Trahando cu tera a duna e hobennan oportunidad pa descubri kico ta
crecemento. No solamente crecemento den contexto di con un mata ta crece di un simia
chikito pero tambe con esaki ta un paralelo di nan mesun desaroyo personal. Door di e
experiencia aki, nan a obtene no solamente habilidadnan practico di hardineria, pero tambe
un comprension mas profundo di cuido propio y resiliencia.
Segun e tayer a yega su final, participantenan a bai cu mas cu solamente pochinan bunita
pinta y simianan nobo sembra. Nan a sali cu un sentido di meta renoba, un conexion mas
fuerte cu nan mes, y hermentnan pa sigui cria na crecemento.
“Tabata berdaderamente un inspiracion pa presencia e hobennan aki bin hunto, uzando nan
creatividad pa asina cuminsa un trayectorio di descubrimento personal”, a remarca Deanna
Lampkin, trahado hubenil na Heart-Centered Leadership Foundation. “E simianan di nan
desaroyo personal a wordo sembra y nos ta ansiosamente anticipa e flornan bunita cu lo
surgi mientras nan sigui duna forma na nan soñonan y aspiracionnan”.
HCLF kier a extende un danki di curason na Monica Franken pa a yuda guia e tayer pa e
grupo di hobennan. Monica Franken ta un “young entrepreneur” cu su negoshi chikito di joyas
y prenda traha na man “Mersea”. Desde 2023 e ta un boluntario bao HCLF su grupo
“Heart-Centered Impact Coaches” cu ta guia hobennan durante actividadnan di e fundacion.
HCLF ta un fundacion cu a establece na 2008 pero desde 2012 ta ofrece hobennan di Aruba
programanan di crecemento personal. Su club hubenil Heart-Centered Youth Leaders a caba
di cuminsa su programa unda 2 biaha pa luna lo tin encuentro cu actividad y tayernan. Cu
Heart-Centered Youth Leaders, e hoben ta siña entre otro conoce su mes miho, sera
amistadnan nobo y positivo, siña comunica miho y pone metanan personal.
Pa mas informacion di HCLF su actividadnan pa hoben por tuma contacto na 5841211 (liña di
whatsapp). Por sigui e fundacion tambe riba su rednan social HCL Foundation riba Facebook
y hclfaruba riba Instagram.
