For di djamars 18 di aprel te ku djaweps 20 di aprel algun delegado di tur seis isla di e parti
karibense di Reina ta partisipá na un tayer tokante fondonan di Union Oropeo pa paisnan i teritorionan
ultramar. E tayer akí tin komo meta pa logra ku e partinan karibense di Reino konhuntamente ta bai
dirigí nan mes mas tantu biaha i mas mihó den direkshon di Union Oropeo, relashoná ku posibel
fondonan pa e islanan. Durante e tayer ta traha riba un plan di aserkamentu tokante kon e islanan i
Hulanda por dirigí nan mes konhuntamente den direkshon di Union Oropeo pa rekoudashon di fondo.
Presensia di sekretario di estado pa Relashonnan den Reino i Digitalisashon, sra Alexandra van Huffelen i
Edison Rijna komo enviado spesial di islanan BES pa fondonan di Union Oropeo, fondonan di Nashonnan
Uní i relashonnan ekonómiko ku Amérika Latino ta suprayá importansia di e kolaborashon akí. Djamars
ta e promé dia di e anterior gezaghèber den e ròl akí.
Sekretario di estado Van Huffelen: ‘Tantu na Union Oropeo komo na Nashonnan Uní tin hopi posibilidat i
oportunidat pa Hulanda Karibense (Boneiru, Saba i Sint Eustatius). Pensa por ehèmpel riba utilisashon di
supsidio i eksplorashon di e posibilidatnan ku fondonan di Union Oropeo, e fondonan na Nashonnan Uní, pero
tambe paisnan di Amérika Latino ta ofresé na Hulanda Karibense. Pa hasi uso di e oportunidatnan akí tin
mester di prinsipalmente tempu i kapasidat pa edifiká un bon ret.
Ku e enviado spesial Edison Rijna, ku sin ningun duda ta trese e eksperensia i ekspertisio korekto, i e resultado
konhunto for di e tayer, a pone un bon base pa konhuntamente hasi mihó uso i den un forma mas efektivo di e
posibilidatnan ku tin.’
E enviado spesial Rijna a agregá: ‘A base di mi ròl komo enviado spesial pa islanan BES, mi por habri
posibilidatnan nobo pa kolaborashon i desaroyo internashonal. Pa motibu di nos relashon ku Union Oropeo
tin hopi oportunidat pa hasi uso di dje. P’esei e tayer akí ta un paso importante pa e islanan i Hulanda
konhuntamente dirigí nan mes mas tantu biaha i mas mihó den direkshon di Union Oropeo. Mi ta anhelá pa
wak e resultadonan di e tayer akí i mi ta inkluí nan den e plannan pa dunamentu di kontenido mas aleu na mi
funshon.’
Durante e tayer e representashon permanente di Hulanda na Brussel, e ofisina regional di Union Oropeo
na Guyana i di Union Oropeo na Brussel mes tambe a duna presentashon.
