Si e pandemia a siña nos algo, ta cu salud mental ta sumamente importante, tin biaha hasta mas importante cu ayudo fisico. Nos por a mira hopi di nos ciudadanonan den nos comunidad confronta nan mes cu problemanan di ansiedad y comportacion, hasta te mas severo cu trastorno di personalidad. E diagnosis di salud mental por ta un tema controversial, y confuso, y ta pa e motibo aki Departamento di Recurso Humano na La Cabana Beach Resort & Casino a invita FADA y CDH, Centro di Desaroyo Humano, pa un tayer cu tema di salud mental organisa recientemente.
E departamento a forma un TLC Committee interno, un comision diseña pa brinda ayudo na empleadonan di e resort, den colaboracion cu trabao social di universidad cu Cindy Figaroa.
TLC Committee su meta ta pa yuda conscientisa empleadonan tocante salud mental, brindando recursonan manera con por siña mas tocante strategianan pa sostene nan mes, pa minimalisa sintoma, maneho di stress, alivia peso di salud mental y crea habitonan mas saludabel, un strategia pa yuda bringa e consecuencianan cu e retonan di salud mental ta trece cu ne.
TLC Committee tambe ta encarga pa sostene empleadonan cu ta experienciando preocupacionnan di salud mental. E comision tambe a introduci e TLC Support Group, specialmente forma pa promove un espacio liber, safe, confidencial y caluroso na tur empleado. E comision ta curasha un atmosfera di igualdad unda participantenan por sinti comfortabel, compartiendo nan sentimentonan sin tin mester di mira atras, y ricibi apoyo di tur hende rond di nan.
E comision a organisa diferente tayer den cuadro cu varios topico. FADA y Centro di Desaroyo Humano a wordo invita pa presenta. FADA a subraya e diferente otro aspectonan di salud mental, relata na adiccion, ansiedad, depresion , asina habriendo un dialogo y discusion tocante salud mental den e ambiente di trabao.
Salud mental ta wordo defini como un estado di bienestar na unda cu un individuo ta realisa su mesun abilidadnan, por maneha e stress normal di bida y traha productivamente cu abilidad di por haci un contribucion na su comunidad.
