Desde 1999 Fundacion Telefon pa Hubentud Aruba pa medio di su servicio ta duna informacion, opcion y sosten emocional na mucha y hoben di Aruba. Pa haci esaki Fundacion Telefon pa Hubentud Aruba ta haci uzo di diferente instrumento manera: telefon, email, chat, website, charla, workshop y proyecto. Den 2021 pa medio di e instrumentonan aki tawatatin 13.689 contacto cu Telefon pa Hubentud. E contactonan tawata di mucha, hoben, mayor y profesionalnan. E serviconan di Telefon pa Hubentud ta ser brinda di dialuna te cu diadomingo. E tres lunanan cu tawatatin mas contacto cu e servicionan di Telefon pa Hubentud ta Juli cu 4002 contacto, september cu 2074 contacto y maart cu 1973 contacto.
E motibonan pa cual un persona por ta den contacto cu e servicio di Telefon pa Hubentud ta diferente. Algun di e temanan ta ‘Situacion na Cas’, ‘Violencia’, ‘Informacion’, ‘Comunicacion’, ‘Derecho di Mucha’ etc. Den 2021 tambe e muchanan, hobenan, mayornan y profesionalnan tawata den contacto cu Telefon pa Hubentud pa diferente motibo. E top 5 di e motibonan pa kiko a tuma contacto cu Telefon pa Hubentud den 2021 ta: Informacion (10.244 momento di contacto), Violencia (838 momento di contacto), Problema mental (655 momento di contacto), media social (401 momento di contacto) y Norma y Balor (274 momento di contacto).
Di 13.689 contactonan den 2021, 2355 tawata hende homber, 2888 tawata hende muher y di 8446 e sexo no tawata indentifica.
Den aña 2020 door di e Pandemia di Covid-19 mester a para diferente training cu tur aña ta wordo duna na e mentornan di Telefon pa Hubentud. Den aña 2021 a sigui cu tur e trainingnan. Asina aki den luna di mei 2021 a logra duna un grupo di persona e training basico di mentor y asina aki a amplia e cantidad di mentornan cu ta esnan cu ta duna e asistencia na telefon, email y chat. Banda di e training basico atrobe por a organisa ‘Deskundigheidsbevordering Dag’ ‘Ningun Grito den Silencio’. E tema di ‘Deskundigheidsbevordering Dag’ tawata salud mental. Ariba e dia aki e training ser duna pa profesionalnan di Respaldo, Bureau Slachtofferhulp di Korps Politie Aruba en Psymia. ‘Reflectie Weekend’ cu tambe ta un di e training cu e mentor ta ricibi tur aña. Durante ‘Reflectie Weekend’ a concentra ariba e salud mental di e mentornan mes, pa asina aki nan por keda duna servicio di calidad na e muchanan, hobenan y adolescentenan di Aruba.
