Edishon “Summer”
Tourism Corporation Bonaire (TCB) a organisá su di kuater Taste of Bonaire pa e aña aki ku a resultá eksitoso i ku bon ambiente.
E evento a tuma lugá riba djasabra 12 di ougùstùs 2023 den Parke Wilhelmina for di 6 or di atardi te 10 or di anochi den un tremendo ambiente ku e tema “Summer”. E Taste of Bonaire akí tabata relashoná ku klousura di vakansi.
E programa tabata kargá ku músika i talento, i tabata tin e stèntnan ku ta bende kuminda lokal i internashonal. E agrupashon di músika krioyo JC & Friends a animá e anochi aki. Pa duna e Taste of Bonaire un toke mas atraktivo, den e parti di show tabatin un tremendo show di baile di The Flash Dancers, presentashon di e kantidatanan pa Miss Teen Bonaire 2023 i DJ Roch. TCB a duna rekonosementu na e gruponan di Special Olympics, Arte di Palabra, selekshon di beisbòl U8 Pony League, Miss Preteen Hispanoamérica International i Miss Petite Hispanoamérica International 2023.
Tambe ofisialmente a instalá Miss Teen Bonaire Nicole Cardenas komo Miss Teen Mundial 2023 ku lo representá Boneiru na e sertamen mas grandi i importante pa hóben ku ta tuma lugá di 24 di sèptèmber pa 30 di sèptèmber 2023 na Korsou. Diputado di Turismo Jolinda Craane tabata presente i a duna tur e hóbennan un medaya i Miss Bonaire Ruby Pouchet a entrega feneta di Boneiru. Nos Miss Tourism Bonaire Caroline Poras a entregá e sertifikadonan di rekonosementu i na final Angelo Domacasse a hasi entrega di un ’goody bag’ di TCB na tur e hóbennan ku a representá Boneiru dignamente. Charlton Thomas tabata maestro di seremonia.
TCB kier a yama un i tur danki pa a bishitá nos eksitoso Taste of Bonaire. E proksimo Taste of Bonaire ta tuma lugá dia 30 di sèptèmber 2023 den un tremendo ambiente turístiko pa sera e luna di turismo.
1 comment
[…] Source link […]