Web Aruba NV ta trahando riba e proyecto di planta di Altovista. Segun vocero di Web Aruba NV esaki ta forma parti di un proyecto mas grandi di WEB NV cu ta Upgrade Aruba Water Distribution Network cu ta encera renobacion di tankinan y pompnan y tuberia rond di nos isla, pero tambe den planta di web mes. Vocero di Web Aruba NV Asja Dongen ta duna di conoce cu tur e renobacion grandi aki mester keda haci pa asina Web NV por keda cumpli cu demanda creciente y awa di nos isla, pero tambe pa por keda cumpli cu calidad halto di awa.
E construccion di e tenki di awa na Alto Vista a cuminsa cu desmantelacion di e tanki bieu cu tabatin un capacidad di 12 mil meter cubico. E trabaonan di desmantelacion a tuma luga aña pasa caba y despues di esaki a cuminsa traha riba e ampliacion di e tereno. Mester a atende cu e tereno mirando cu e tanki no bo su oppervlakte ta hopi mas hancho y menos halto. Mirando esaki mester a prepara e tereno y mester a traha e fundeshi cu mester por carga un capacidad di awa di casi 18800 mil meter cubico. Awor ta cla cu e parti di fundeshi y e proceso cu ta na caminda ta pa construi e tanki nobo.
Segun vocero di Web Aruba NV Asja Dongen e tanki nobo tin un aparencia completamente diferente cu e tankinan cu Aruba ta custuma cu ne. E cambio aki ta pa e tanki por preserva e calidad di awa mas miho ainda. Tambe e tanki ta traha di materialnan mas sostenibel pa por contribui na un calidad mas halto di awa.
