Durante e reunion publico di diahuebs mainta den Parlamento di Aruba pa duna informacion tocante COHO, Prome Minister Evelyn Wever-Croes a duna amplio splicacion di e 3 diferente producto di negosacion cu Hulanda cuanan ta Lanspakket, COHO y RAFT. Esakinan ta tres documento cu ta relaciona na otro pero ta diferente.
LANDSPAKKET:
E prome producto di negosacion cu Hulanda ta e Landspakket. E landspakket ta un documento cu a wordo firma caba dia 13 di november 2020.
E landspakket ta duna den liñanan grandi kico ta e condicionnan cu Hulanda ta bisa cu Aruba tin cu cumpli cu ne pa nos por crea di nos sistema economico, nos structura y fundeshi uno fuerte y resiliente pa percura cu nos por paga Hulanda bek. Tambe si bin un siguiente sla of golpi cu e no lo kibra nos di e manera cu e la kibra nos ultimo aki.
“Aruba tabata e pais den Reino mas afecta pa e pandemia aki debi na nos dependencia asina grandi di turismo. P’esey nos kier logra pa despues di esaki nos ta mas fuerte pa si cualkier cos di e indole aki bolbe pasa, nos no wordo afecta di e tanto ey”.
Prome Minister a menciona cu e puntonan menciona den landspakket pa 80-90% tabata igual of alinia caba cu locual nos propio profesionalnan na comienso di e pandemia a bin hunto y stipula den e masterplan. Nan a wordo pidi pa delinia cua ta e caminda cu Aruba mester tuma pa sali for di e crisis aki pa nos ta mas fuerte y mas resiliente y danki na e trabou ey cu a haci na comienso di e crisis, ora cu Hulanda a bin cu e landspakket, mayoria di e puntonan tabata caba den e masterplan. E landspakket ta un documento valido y a base di esaki cada kwartaal nos lo bin hunto pa negocia pa sa kico nos ta bay enfoca riba dje pa e siguiente kwartaal.
E agenda di ehucusion di kwartaal 3 cu Aruba ta den aworaki, a wordo negocia cu Hulanda prome cu e kwartaal a cuminsa y awor nos ta den fase pa negocia kwartaal 4. Hulanda ta manda su delegacion cu ta sinta cu e delegacion di Aruba y ta bishita instancianan cu ta necesario pa papia cu nan y traha hunto cu nos e ora riba kio ta ‘haalbaar’ pa e siguiente 3 lunanan. Tin biaha, Prome Minister ta indica, nan kier cosnan demasiado ambicioso y e ora nos profesionalnan ta splica nan pakico no mester bay mucho lihe.
“Hende ta bisa cu landspakket ta firma di 13 di November aña pasa y nada un cambia. Sinembargo, cada kwartaal di nobo nos ta cambia e agenda di ehecucion. Cumpliendo cu tur transparencia, Parlamento ta prome cu ta haña e agenda di ehecucion manera e wordo firma pasobra esaki ta e respet cu Gobierno tin na Parlamento. Despues e ta wordo publica. Parlamento por mira stap pa stap cua ta temanan cu ta bay haña atencion e siguiente kwartaal y kico e deadlines nan ta.