Tur hende mester ta na altura, cu mester tin respet pa Dios,pasobra e rosea cu nos ta hala ta bini for di Dios. Pero e sistema di mundo a pone cu hende a bira materialista, inmoral, indecente, perverso, impuro cu e respet pa Dios, pa nan prohimo y nan mes ta degenera cada dia.( Isaias 5:20)
Cuanto biaha nan a bira rebelde contra dj’E den tera seco y haci’E tristo den desierto.Y bes tras bes,
nan a tenta Dios,y provoca Esun Santo di Israel.( Salmo 78:40-41).
Hopi hende tin ta provoca Dios diariamente, cu palabra, actitud, demostrando cu nan no kier somete nan mes na Dios. Nan ta ninga tur clase di coreccion y usa e excuus di no huzga mi.
E palabra di Dios ta bisa: Pasobra e mente fiha riba carni ta enemistad cu Dios,pasobra e no ta somete su mes na ley di Dios, como e no ta capas di haci esey tampoco. Y esnan cu ta den carni no ta agrada Dios.( Romanonan 8:7+8).
Ora hende no ta respeta Dios y ta biba den rebeldia contra Dios e Spirito di Dios ta aleha for di dje.
Asina nos por compronde dicon tin hopi hende bao di stress y depresion, pero nan tur por wordo libera si nan arepenti y bolbe bek serca Dios.
Ora un hende ta biba den Odio contra su ruman, e ta wordo mira dilanti di Dios como un matado y nos tur sa cu ningun matado no tin bida eterno ta permanece den dje. ( 1 Juan 3;15).
Sabi cu den e ultimo dianan bofonadornan lo bini, cu nan bofon siguiendo nan mes pasionnan. (2 Pedro 3:3).
Pesey awor a yega e momento cu nos tur tin di para firme pa respet pa Dios, den nos Hogar, Famia, Matrimonio,pasobra tin yen di atake diabolico riba famia, matrimonio, y nos yuinan pa asina causa cu nos ta falta respet pa Dios.
Mayoria biaha ora un hende ta falta respet pa Dios cu su forma di biba, actitud of conducta, e ta usa e “Slogan’’ conoci di bisa “no husgami” sin sa cu coreccion di hende, ta pa evita huicio di Dios.Ta un cos teribel pa cay den man di e Dios bibo.( Hebreonan 10:31).
Dios ta spierta nos bon cla kico lo pasa cu esnan cu no tin respet pa Dios bisando:
Pesey Dios tambe a entrega nan na impuresa, den e pasionnan di nan curason, pa nan deshonra nan mes curpa.
Pasobra nan a cambia e berdad di Dios, pa un mentira y a adora y a sirbi e criatura enbes di e Creador. Kende ta bendiciona pa semper. Amen. ( Romanonan 1;24-25).
Ora hende no tin respet pa Dios nan ta biba bao di un capa di mentira, cu hasta ta haci nan wowo scur cu un felicidad falso, pasobra caminda no tin respet pa Dios y su Palabra no tin felicidad berdadero,
Cuanto hende ta falta respet pa Dios, pensando cu pasobra tin placa, ya no tin mester di Dios, y na momento di malesa of problema ta tur clase di oracion ta wordo haci na Dios.
Hendenan malbado y gañadornan lo bay di malo pa peor, gañando y siendo gaña.(2Timoteo 3:12).
Ta tempo pa hopi oracion, wordo haci den tur hogar,tempo pa ayuno y vigilia, tempo pa para firme y somete nos mes tur dia na Dios, pa asina e enemigo lo huy for di nos.
No participa den obranan infructifero di scuridad, sino mas bien expone nan (Efesionan 5:11), aparta for di maldad y busca Dios di henter boso curazon.
