Director di DOW Marlon Croes a anuncia cu a completa e prome fase di renobacion di beachnan “Proyecto Beach Zand”. Prome Minister di Aruba Evelyn Wever – Croes a splica di e vision di Gobierno pa logra e recuperacion, progreso y bienestar pa henter nos comunidad.
Durante di un aña y mei bayendo pa dos, Gobierno a lanta un comision yama: “Aruba Amenities”, den e comision tin representantenan di DOW, DIP, DNM, ATA, Ministerio di Finanzas y Cultura, Departamento di Asunto Economico, Museo Arqueologico Nacional Aruba y ECA. Miembronan di e comision ta dedica atencion na nos patrimonionan natural y historico pa asina crea programanan di renobacion di e area y facilidadnan y tambe purba crea oportunidadnan nobo pa nos comunidad.
Eagle Beach, ta un playa cu a haya reconocemento internacional como un di e playanan mas bunita di Caribe y di mundo.
Prome Minister Wever – Croes a splica cu desde gobernacion anterior, a aloca den presupuesto fondonan necesario pa inverti den e trabounan pa saca santo blanco for di sitionan den lama unda ta permiti pa DOW y DIP y DNM.
‘Mensualmente mi a haya update di e trabounan y despues di a renoba e beach na Arashi, Boca Catalina, Fishermans Hut un parti, awe nos ta aki na Eagle Beach caminda trabounan ta den nan fase final.’
TRABOU REALISA
Na Eagle un trabou special a wordo haci pa renoba e santo blanco bou di matanan di druif. E santo aki a satura y cambia di color despues di decadas cu tabata tin campamento, y cu lamentablemente mester bisa cu nos mes a destrui e bunita beach aki. DOW a percura pa haci e area limpi pa awor e Santo Blanco nobo por wordo basha. E cambionan aki ya caba a trece esfera masha bunita y agradabel, especialmente pa tur esnan cu ta desea di bin pasa dia disfrutando di lama y toch sinta den un poco sombra di e matanan di druif of tambe pa esnan cu ta desea di cana den santo blanco haci ehercicio y distrai pa un rato, Premier Wever – Croes a splica.
‘Mi ta invita tur nos ciudadanonan pa experiencia esaki, djis bin cana aki un atardi, mira e beyesa di bahada di solo, gosa di e aire fresco. Trece e muchanan pa nan hunga riba beach. Nos tin beyesanan natural inmensamente bunita.’
Ta hopi importante pa pareu cu ta renoba e patrimonionan pa tambe pone atencion na con por yuda cuida nan. Aruba su playanan ta un habitad natural hopi sensitivo caminda hopi especie ta biba; di e mas grandi cual ta e turtuganan cu ta bolbe tur aña bin pone webo y percura pa nan siguiente generacion, te na esunnan di mas chikito manera; cangreu, soldachi y piscanan. Tambe nos mata y yerbanan di lama y e parhanan cu ta frecuenta e areanan precioso aki di nos naturalesa. ‘Pesey laga nos tur sea mas consiente cu no ta hende so tin mester di nos playanan, nos tin cu comparti cu e otro especienan tambe di naturalesa’, Premier Wever – Croes a expresa.
PAGINA PA CONSCIENTISACION
E siman aki e comision ta lansando tambe un pagina nobo riba e Website di DOW cu lo bay wordo promovi tambe riba Facebook y otro Website y medionan, pa asina crea mas conscientisacion pa e cuido cu nos playanan y tur otro patrimonio natural di Aruba.
‘Un naturalesa bon cuida ta di gran balor pa nos local pero tambe pa nos bishitantenan cu ta inverti pa bin pasa nan vacacion cerca nos.’
Finalisando Prome Minister a remarca cu a declara e aña aki como e aña di “Inversion y Oportunidad”. Cu e trabounan aki na Eagle Beach a completa e prome fase di e renobacion di nos playanan. Durante e aña aki trabounan lo sigui na otro Playanan y Patriminionan Natural y Historico; entre otro na Ayo, Casibari y pronto Seroe Colorado y San Nicolas. Cu na un ocasion mas adelanta lo amplia mas riba dje. ‘Berdad nos ta bringando contra e pandemia ainda, pero mes momento nos ta preparando pa Aruba post covid. Esaki riba su mes lo genera mas desaroyo economico y mas entrada,’ Prome Minister a conclui.
