Durante conferencia di prensa di Gobierno dialuna ultimo CEO di Oficina di Turismo Ronella Croes a duna di conoce cu Aruba a ricibi un total di 84,592 bishitante ‘stay-over’ pa luna di juni. Si compara luna di juni 2021 cu juni 2019 -cu tawata e ultimo aña normal di turismo, por deduci cu Aruba a recupera 85% di locual el a ricibi na juni 2019.
RECUPERACION FUERTE
Esaki sin duda ta e recuperacion mas fuerte cu Aruba a mira desde re-apertura di nos frontera na juli aña pasa y por mira e tendencia di recuperacion mensual pa e aña’ki cual ta mustra un tendencia di grado di recuperacion mas fuerte segun ta cera cada luna di 2021.
Pa e prome 6 lunanan di 2021, Aruba a ricibi un total di 326,387 bishitante y esaki ta ekivalente na un recuperacion di 57% compara cu prome mita di 2019.
E proyeccionnan pa di dos mita di aña ta mustra cu lo por sigui duna un adelanto y ta proyecta pa cera 2021 cu un recuperacion di 76% di turismo compara di loke Aruba ricibi na aña 2019.
AHUSTACIONNAN PA BIAHA PA ARUBA
Pa nos destinacion, e mercado mas fuerte cu ta trece mas hopi bishitante ta Merca y den e recuperacion aki por mira cu juni 2021 compara cu juni 2019 Merca su recuperacion pa cu bishitantenan ta di 98%.
Pa haci e biahe pa nos isla mas conveniente pero semper teniendo na cuenta e siguridad pa cu nos bishitantenan pero tambe nos comunidad local, desde 14 di juli 2021 Aruba lo flexibilisa entrada –te ainda- solamente pa bishitantenan di Merca. Lo ahusta e rekisitonan pa cu e PCR test cu awo cada Mericano drentando Aruba mester tuma prome cu nan bishita Aruba. Lo cuminsa acepta prueba di vacunacion en bes di test pa residentenan di Merca pero mester menciona cu esaki ta un prome paso y te ainda lo ta na vigor pa solamente esnan cu tin e Smart Health Card cual por wordo obteni door di esnan cu a vacuna na cualkier Walmart y Sam’s Club Pharmacy na Merca. Esaki ta obtenibel tambe pa esnan cu ta biba den estadonan di California y Louisiana, na unda nan lo por obtene e Smart Health Card no obstante unda nan a vacuna.
Naturalmente esaki ta den pleno desaroyo y segun desaroyo lo ahusta e rekisitonan. Pa mas informacion y splicacion por bishita https://www.aruba.com/us/traveler-health-requirements
Banda di esaki, lo sigui traha riba e aspecto di e seguro mandatorio pa cada bishitante no-residente di US$ 30.- y lo anuncia rebaho di e tarifa aki pronto.
TURISMO CRUCERO
Na juni Aruba a habri atrobe pa ricibi turismo crucero y asina a yama bonbini na e barco Millennium di e liñea crucero Celebrity cu un total di 3 bishita pa Aruba. Esaki a trece hunto 1.580 turista crucero pa nos Aruba, cual ta 98% menos cu loke Aruba a ricibi na pasahero di barco na juni 2019. Turismo crucero lo sigui ta un proceso di recuperacion gradual. E siman aki a yama bonbini na e prome barco di Carnival Cruise Lines, cu ta Carnival Horizon cu un total di 2.800 pasahero.
Ta bon pa menciona cu esaki ta e prome barco cu Aruba a ricibi cu ta saliendo for di Port of Miami, asina gradualmente barconan lo cuminsa sali atrobe for di Miami, Florida.
Asina poco poco e industria di turismo lo ‘normalisa‘ bek cu ahustacionnan pa asina tene e siguridad di e bishitantenan como tambe e localnan na prome luga.