ORANJESTAD,Aruba
Den cuadro di cinco caso nobo di COVID-19 registra na Aruba, Gobierno a anuncia diferente medida cu ta bay tuma. Di su banda Minister Chris Romero, encarga cu Transporte Publico tambe a anuncia medidanan preventivo pa esnan cu ta haci uzo di transporte publico of ta brinda e servicio aki.
Despues di e anuncio di dialuna anochi di Prome Minister Evelyn Wever Croes, e mandatario encarga cu Transporte, Chris Romero, a saca un declaracion informando cu tur hende mester cumpli cu e medidanan preventivo pa evita contagionan local di e coronavirus.
Gobierno ta urgi tur persona pa haci uzo di un mondkapje of shield ora di haci uzo di medionan di transporte publico, esta na momento di haci uzo di bus, autobus, taxi y tour vehicles. Ta di suma importancia pa haci uzo di e mondkapje of shield na luganan publico unda cu dificilmente por mantene un distancia social di 1.5 meter. E medida aki ta bo mesun proteccion pero tambe siguridad di otronan.
