For di 1 di yüli 2022 e Visitor Entry Tax a remplasá e ‘room tax’ i e ‘rental car tax’ ku un suma di 75 dòler ku mester paga un biaha so promé ku yegada na nos isla. Tin wèpsait di rebendedó ku di ningun manera no ta vinkulá ni tin ningun relashon ku gobièrnu di Boneiru (Entidat Públiko Boneiru) òf ku Tourism Corporation Bonaire (TCB). Pues hopi biaha turista ku ke bishitá Boneiru innesesariamente ta gasta mas sèn na e impuesto di turista (Visitor Entry Tax). E úniko wèpsait korekto pa hasi pago di e impuesto di turista ta https://tourismtax.bonairegov.com.
Por alkansá esaki tambe via un lenk riba e wèpsait ofisial di Boneiru: www.bonaireIsland.com òf riba wèpsait di un di e otro stakeholdernan, manera https://bonaireinternationalairport.com. E rebendedónan hopi biaha ta pidi te desenas di dòler èkstra pa paga Boneiru su Visitor Entry Tax pa e turista. Pa e motibu akí Entidat Públiko Boneiru i TCB no ta responsabel pa e informashonnan personal ku e biahero ta duna e wèpsaitnan ei (por ehèmpel informashon di credit card i otro informashon sensibel).
No ta un echo kastigabel
For di luna di desèmber 2022 Entidat Públiko Boneiru ta den kontakto ku Polis Sibernétiko di Kuerpo Polisial Hulanda Karibense. Nan ta indiká ku nan no ta mira niun echo kastigabel den e wèpsaitnan di rebendedó i p’esei na e momentu akí nan no ta mira ningun motibu pa mas investigashon: ‘E rebendedónan ta kobra e impuesto di turista komo un servisio. Riba nan wèpsait tin bon kla poné ku nan ta un empresa privá i ku nan ta ofresé esaki komo un servisio. Nan ta menshoná tambe ku di e suma mas haltu ku e turista ta paga, nan ta entregá 75 dòler di impuesto di turista na Boneiru. Ta e propio responsabilidat di e bishitante pa informá su mes bon tokante e tarifanan korekto. Nan no ta oblig’é pa paga mas.’
E hefe di departamento di Finansa tambe a bisa: ‘Di e bishitante ku via e wèpsait akí a paga un suma mas haltu, nos ta risibí 75 dòler riba nos kuenta di banko manera mester ta, i e bishitante na su turno ta risibí un QR code ku kua e por bishitá nos isla sin ningun problema’. Konseho di polis ta pa konsentrá kompletamente riba komunikashon i informá bishitantenan tokante e suma korekto i e wèpsait korekto. Miles Mercera, direktor di TCB ta indiká ku nan ta trahando duru riba esei, pero ku yudansa di e sektor tambe ta deseabel. Resientemente a hasi uso di un suma grandi pa bai te mas ariba den e resultadonan di búskeda online i kontinuamente ta monitoreá esaki.
Yamada urgente
Entidat Públiko Boneiru i TCB ta hasi un yamada urgente na kompanianan di aviashon, hotèlnan, kompanianan di hür outo i skolnan di buseo pa den e konfirmashon na nan klientenan i wéspetnan pone énfasis riba e wèpsait ofisial https://tourismtax.bonairegov.com, di manera ku nan no ta paga muchu hopi sèn na Boneiru su impuesto di turista (e Visitor Entry Tax) sin ku esaki ta nesesario.
Pa mas informashon òf si bo tin pregunta, por manda un imeil na taxsupport@bonairevisitortax.com
