ORANJESTAD, Aruba
Para dilanti di edificio di aeropuerto Reina Beatrix, lider di fraccion di AVP, Marlon Sneek a mustra riba desaroyonan negativo y dudoso den henter e proceso di retiro di trahadonan di Triple A NV.
“Un luna pasa nos a trece dilanti caba, para na mesun sitio aki, cu aeropuerto ta bezig ta kiando hende for di trabou.
Por a mira ex Minister Otmar Oduber con el a bin dilanti y defende su mes, sigurando cu manera e maneho di gabinete Wever Croes ta, cu lo no kita ningun hende for di trabou despues cu a discuti e hecho cu a retira trahadonan for di e tempo ey DIP pero na triple A si bou di Minister Dangui Oduber tabata mandando trahadonan cas.
Nos por a compronde cu tabatin 27 trahado kendenan a dicidi di bolubnariamente tuma nan retiro pero gerencia a laga sa cu tin 40 trahado mas cu mester wordo manda cas.
Awor nos kier sa kico ta e co-relacion entre locual tabata a prestamo di 500 miyon florin cu aeropuerto a haci cu mandamento di trahado cas.
Un compania cu tur aña tabata book y nos por a mira e cifranan aki ya cu como Parlamentario nos ta haya e Jaarrekeningnan, miyones na ganashi entre 18 cu 26 miyon Triple A ta strika pa aña na ganashi.
Awor ta bon pa splica ta kico a pasa den tres luna di covid y si esey ta e motibo of ta mal gastamento di placa tabatin anto awor ta usa e covid pa sconde esaki?
Ta inaceptabel y ta increibel c’un compania cu ta asina solvabel te cu el a haya 500 miyon florin na prestamo, awe tin cu manda hende cas. Tin cu manda 70 tata y mama di famia cas kendenan awo tin cu bay mira con ta pone pan riba mesa.
Anto informacion cu nos tin ta cu Minister ta bon na altura di tur e proceso aki y pa fraccion di AVP ta sumamente importante pa nos sa kico actualmente ta pasando den aeropuerto di Aruba.
No lubida tambe cu aeropuerto di Aruba esta Triple A, a haci uso di ‘salaris subsidie’ pues nan mester a saca menos di nan placa pa paga trahado ya cu nan a haci uso di loonsubsidie.
A pone trahadonan baha 12.5% di nan salario, mientras cu ainda ta papiando di un otro 20% cu salario di e trahadonan aki tin cu baha, sin conta e 70 hendenan cu tin cu bay cas.
Pues ta un desaster total tin anto den e maneho di Triple A? of triple A ta solvabel y pa nos esaki ta trece hopi incertidumbre y pesey nos di fraccion di AVP ta para hunto cu e trahadonan haciendo pregunta na e Minister y nos ta spera di por haya contesta di e Minister tambe.
Minister no keda sin contesta manera cu e ta haci tur ora y den esaki Minister mester contesta pa motibo cu trahadonan di Triple A merece di haya claridad riba nan situacion.
Ta imposibel c’un compania manera Triple A cu ta stricando entre 16 y 26 miyon florin pa aña na ganashi, caminda tabata duna gobierno, 3, 4, 7 miyon florin na dividendo, anto awe tin cu manda trahado cas! Ta kico a pasa?
Pueblo merece di sa ta kico a pasa den e compania estatal aki cu di repiente ta bay manda 70 empleado cas of ta trahando espacio nobo pa un compania di afo bin haci cierto trabounan di Triple A?
Pa friends and family atrobe bin djo djo den Triple A y esey nos kier sa y mester corda bon cu a haci un prestamo di 500 miyon florin pa bay haci un ampliacion di aeropuerto caminda a bay duna mas servicio, por acapara mas avion na mes momento, anto bo ta mandando hende cas?
Of ta traha ta trahando espacio pa un compania di afo bin y tuma cierto contract manera security over, of cierto handelingnan over, creando espacio pa friends and family bin goza atrobe.
Esey ta preguntanan cu nos a haci na e Minister y nos ta spera cu Minister tey pa contesta pasobra trahadonan ta pendiente di esaki.
Ta un lastima cu e sindicato mes di e trahadonan aki, kende ta representa e trahadonan, nos ta mira nan ta masha keto, caminda a tarda masha hopi pa nan sali dilanti pa e trahadonan y awor cu nan a haci esey, nan ta manera pushi pushi ya cu tur hende sa cu nan ta coordinado di Minister den gobierno pero esaki no a aceptabel.
Como sindicato bo a eynan pa defende e trahado y a inaceptabel c’un compania manera Aruba Airport Authority tur aña tabata strika miyones na ganashi y cu awe ta ampliando aeropuerto haciendo esaki mas grandi, ta mandando hende cas.
E dos cosnan ey no ta klop cu otro ya cu ta un maneho straño caminda 70 mama y tata ta bay perde trabou, caminda ya caba a corta 12.5% riba salario y 20% cu ainda tin cu wordo entrega ainda, pues un maneho straño y fraccion di AVP kier sa si ta malversacion of mal maneho tabatin anto cu ta pesey tin cu manda hende cas of nos kier sa si ta espacio ta trahando pa mayan tuma servicio di un compania di friends and family ta bay djo djo atrobe den un compania estatal,” lider di fraccion di AVP, Marlon Sneek a declara.
