Sekshon di Kultura, Arte i Literatura den e siman benidero ta bai kuminsá ku registrashon di grupo i/òf personanan ku ta aktivo riba e tereno di músika, kanto, arte, baile, poesia, kontadónan i/òf eskritornan di kuenta. Ta trata aki di tur loke ku tin di aber ku Kultura, Arte i Literatura.
Den pasado a hasi intentonan pa por optené datonan aki di manera ku SKAL por tin esakinan den un registro aktualisá. Sinembargo pa un òf otro motibu konstantemente tin kambionan den e mundu farandulero i tambe riba tereno di arte i literatura. Tambe tin momentunan ku ta nase talentonan nobo ku no ta yega na konosementu di e departamento konserní.
E intenshon tras di e proyekto aki ta pa netamente sa serka ken mester akudí ora ta trata di sierto proyektonan spesífiko. Mas aleu e registro aki ta sirbi tambe pa trata na enbolbí mas tantu artista posibel den nos eventonan lokal, prinsipalmente aktividatnan gubernamental.
Nos ta dispone di hopi talentonan den tur ramo riba nos isla i nos deber pa stimulá i desaroyá nos artistanan tratando na bini ku proyektonan pa elevá kada artista riba nan tereno.
Gobièrnu di Boneiru pa medio di su Departamento di Kultura, Arte i Literatura ta hasiendo intentonan pa bini ku ideanan genial (brainstorm) pa di tur manera stimulá i promové nos artistanan den tur sentido di palabra.
Banda di aktividatnan ku ta eksistí kaba, ta studiando e posibilidatnan pa bini ku proyektonan edukativo i desaroyo di talentonan, pa garantisá eksistensia i mantenshon di nos kultura den tur sentido di palabra.
Entrante djabièrnè 30 di di òktober 2020 por tuma kontakto ku Sekshon di Kultura, Arte i Literatura, na telefòn 715-3615 òf 717-5330 ekstenshon 3615 pa un sita. Tambe por manda e-mail na robert.sances@bonairegov.com.