Minister Maduro ta e siman aki na Hulanda pa brinda un bista riba e situacion financiero di Aruba
E siman aki Minister Maduro hunto cu Minister President ta na Hulanda pa asina por reuni cu diferente persona y instancia pa brinda un bista riba e situacion financiero di Aruba. Esaki ta necesario pa asina na Hulanda tambe por tin un bon bista di e trabounan cu a wordo haci pa recupera e credibilidad financiero di nos Pais. Sigur awor cu Aruba a acumula un debe di 500 miyon Euro na Hulanda pa surpasa e pandemia di COVID-19, ta bon pa na Hulanda tambe nan por tin un bista con Aruba ta para financieramente.
Denter di poco Aruba mester cuminsa paga e debe aki bek na Hulanda. Como cu e debe aki tambe ta afecta e credibilidad financiero di nos Pais, ta importante pa Aruba haya claridad mas pronto cu ta posibel riba e condicionnan cu lo compaña e pago di e debe acumula cu Hulanda. E presentacion financiero cu lo wordo brinda durante e bishita na Hulanda, sigur lo por contribui pa por tin mas conocemento di e situacion financiero y e capacidad di Aruba pa paga e debe bek na Hulanda.
Pa Aruba ta importante pa por haya claridad riba e condicion di pago di e debe acumula cu Hulanda pa asina por informa Aruba su creditornan debidamente. Aruba kier mantene un bon ‘standing’ cerca su creditornan y pesey ta importante pa tin claridad mas lihe cu ta posibel.
