Esun cu despresia instruccion lo paga pesey, ma esun cu teme e mandamento lo wordo recompensa.(Proverbionan 13:13).
No tin nada mas doloroso, ora hende sa masha bon cu nan ta bay contra palabra di Dios, y nan ta haci otronan daño, pero nan ta persisti den nan capricho, y curazon duro,y no ta tene cuenta cu Dios.
E ta keda manera un yiu cu sa masha bon ,cu e mester cumpra remedi pa su mama,cu ta hopi malo na cama pero e ta bebe e placa, of un tata cu sa masha bon, cu su yiu chiki mester di remedi y cuminda, pero toch e usa e placa na droga.
Ignora y rechasa Dios ta hiba nos na rebeldia y idolatria, ta haci hende sinberguensa, y sin bo mes por pensa, bo ta perde tur clase di respet pa bo mes y otronan, pasobra ningun hende ta haci bofon di Dios.
No ta tempo mas di haci wega, pero den e tempo cu nos ta bibando nos tin di cuminsa, splika nos yuinan for di chikito, kico ta e consecuencia di falta di respet, ignora, rechasa, no reconoce y haci bofon di Dios. Pasobra nos tur sa y ta mirando tur momento serca nos mes y rond mundo e dolor cu ta existi.
Kico Bijbel ta bisa cu lo pasa cu hende cu no ta reconoce, pero ta rechasa y ignora Dios? Den cual peliger nan bida ta corre? Ma mescos cu nan no a haña necesario pa reconoce Dios, Dios a entrega nan na un mente perverso,pa haci cosnan cu no ta cumbini, Nan ta yen di inhusticia,maldad,golosidad,perversidad,yen di envidia,matamento,pleito engaño,malisia,nan ta hacido di redo, calumniado,odiado di Dios,grosero, arogante,gabado, inventado di maldad, desobediente na mayornan,sin comprendemento,inconfiabel, sin amor,sin misericordia,y maske nan conoce e ordenansa di Dios, cu esnan cu ta practica e cosnan asina merece morto, nan no ta solamente haci mesun cos, ma cu gusto ta duna aprobacion,tambe na esnan cu ta practica e cosnan aki.(Romanonan 1:28-32). Den Oseas 4:6+7 e palabra di Dios ta bisa lo siguiente; Mi pueblo ta wordo destrui pa falta di conocemento, Pasobra bo a rechasa conocemento, Ami tambe lo rechasa bo di ta Mi saserdote.
Como cu bo a lubida e ley di bo Dios, Ami tambe lo lubida bo yuinan.
Mas nan a multiplica, mas nan a peca contra Mi, lo Mi cambia nan gloria den berguensa. Ora Dios pone un yamada riba nos bida pa educa Su Pueblo, y prepara Su pueblo, pa Su binida,nos ta responsabel dilanti di Dios, pa esey , y nos mester bisa e berdad, y no preocupa, ken ta rabia of ken no gusta, pasobra ni maske kico cu nos haci nos no por sconde e berdad di Dios. Dicon tin tanto problema den nos comunidad?
Dicon tin tanto divorcio?
Dicon tin tanto famia kibra?
Dicon tin tanto mucha y hende grandi den rebeldia?
Dicon tin tanto violencia relacional, of violencia domestico?
E problema no ta placa, e no ta falta di trabao, e ta e gran necesidad di Dios den curason di hende,
hende a bandona y rechasa Dios, gara na material y inmoralidad, y conociendo Dios, nan ta haci bofon
di Dios.
Den Juan 3;36 e palabra di Dios ta bisa lo siguiente: Esun cu kere den e yiu, tin bida eterno, ma esun
cu no obedece e Yiu lo no mira bida, ma e furia di Dios ta keda riba dje.
Den Juan 12:48 ta para scirbi: Esun cu rechasa Mi y no ricibi Mi palabranan , tin un cu ta husg’e y e
palabra cu Mi a papia, esey lo husg’e den e ultimo dia.