Durante di e siguiente seremonia den e ‘Tuin van Bezinning’ ku lo tuma lugá den yüni, lo agregá nòmber di Ferry Bakx. Eks kolega Ferry Bakx a fayesé na 2016 durante ku e tabata traha komo agente polisial pa Kuerpo Polisial Hulanda Karibense (KPCN) na Boneiru. Na momento ku e a yega na un atrako na un kas a tir’é ku konsekuensia fatal.
Dilanti di warda di polis na Boneiru tin un monumento konmemorativo pa Ferry. Tòg tabata un deseo di hopi tempu di famia i koleganan pa agregá su nòmber tambe den e ‘Tuin van Bezinning’ na Warnsveld. Na 2006 a lanta e monumento ofisial aki komo konmemorashon i homenahe pa persona polisial di ‘Nationale Politie’ ku a bin fayesé durante ehekushon di su trabou. Of mihó bisa: ‘In the line of duty’.
E último tempu hefe di kuerpo di ‘Nationale Politie’, Henk van Essen, a okupá su mes ku e kaso aki. E ta di opinion ku ta trata di ‘sirkunstansianan spesial’ i pa e motibu ei a hasi un petishon ofisial na e direktiva di e fundashon, pa agregá Ferry tòg ainda den e ‘Tuin van Bezinning’. Direktiva di e fundashon, ku tin tomo di desishon tokante esaki, a honra e petishon. A hasi esaki a base di e asina yamá ‘hardheidsclausule’ den e statütnan, ku tin e propósito pa hasi eksepshon.
Na nòmber di e kuerpo kompletu hefe di kuerpo di Kuerpo Polisial Hulanda Karibense, Alwyn Braaf ta ekspresá satisfakshon tokante esaki, ‘for di momento ku e deseo di e famianan a bira konosí pa nos, nos komo kuerpo a sostené esaki kompletamente. Tambe a hiba kombersashonnan ekstenso ku hefe di kuerpo di ‘Nationale Politie’, Henk van Essen pa duna nos kontribushon pa ku e petishon ofisial. Nos komo miembronan di Kuerpo Polisial Hulanda Karibense ta hopi kontentu ku e resultado aki.’
