Ningun hende no tin e poder di manda otro cielo of fierno, pero si un hende rechasa e plan di salbacion
cu Dios ta ofrece na tur hende den Juan 3:16 e persona ey lo keda bao di condenacion, y manera bijbel
ta bisa e lo bay perdi..Pasobra e a rechasa e Yiu unigenito di Dios, pasobra e a prefera di permanece
den scuridad, hayando e oportunidad pa kere den Cristo Hesus.
Hesus a bisa cu e maishi y e yerba shimaron lo crece hunto ( Mateo 13:27-30) y na final e lo manda su
angelnan pa haci e separacion, esey ta nifica cu mientras nos ta na mundo, nos no tin di huzga nada
prome cu tempo, pero stima nos prohimo, manera Dios a bisa, y haci tur locual ta posibel pa e
prohimo por alcansa e Palabra di Dios pa salbacion di su alma.
Porta den nos bista un hende ta inmoral, sushi, criminal,antisocial, corupto, adultero, homosexual,
lesbiana, adicto,violador, abusador,ladron,pedofiel, sinberguensa,pero nos no tin di lubida, cu si un
persona asina arepenti Dios ta pordona e persona ( Salmo 103:3).Pesey Hesus a bisa den Mateo 11:28 :
Bin serca mi tur cu ta cansa y carga y lo mi duna boso sosiego.
Laga nos splica hopi bon y hopi cla: Cielo ta Real. Y Fierno ta Real.
Cielo ta real bo por lese hopi cla den Juan 14:1-3.
Fierno ta real bo por lese den Lucas 16:19-31.
Ta para scirbi cu hende por scohe: Di berdad , di berdad,Mi ta boso, esun cu tende Mi Palabra y kere
Esun cu a mandami,tin bida eterno,y no ta bin na huicio,ma a pasa for di morto pa bida.( Juan 5:24).
Di otro banda ta para bon cla scirbi den Juan 3;36; Esun cu kere den e Yiu tin bida eterno. Ma esun cu
no obedece e Yiu lo no mira bida,ma e furia di Dios lo keda riba dje.
Den esaki nos ta mira bon cla cu ningun hende no por condena, ningun hende, pero pa desobendencia,
rebeldia, negligensia,falta di pordon, bofon di Dios, religiosidad falso,inmoralidad,
abominacion,rechaso di e palabra di Dios, pa continua den un bida di pica y scuridad, e final lo ta
fierno, pasobra tur locual hende sembra nan lo cosecha.
Cristo Hesus ta e unico caminda pa cielo, E so por salba, E so por libera,E so ta e caminda di berdad y
bida.
Laga nos no lubida locual ta para scirbi den Efesionan 2:8-9: Pasobra pa medio di gracia, boso a
wordo salba door di Fe,y esey no di boso mes,e ta e don di Dios,no como resultado di obranan,pa ni un
hende no gaba.
Drenta door di e porta smal, pasobra hancho ta e porta, y espasioso ta e caminda cu ta hiba na
destruccion, y hopi ta esnan cu ta drenta door di dje. Pasobra chikito ta e porta y smal e caminda cu ta
hiba na bida,y poco ta esnan cu ta hañe.( Mateo 7:13).
No bay tras di ningun hende, no laga ningun hende dicidi pa bo, pasobra na final nos tur mester duna
cuenta personal na Dios, di tur locual nos a haci sea bon of malo.
No kere den ningun fantasia, pasobra ora un hende muri sin Cristo Hesus, sin salbacion, no tin bida
eterna pe, tampoco pensa cu na ultimo momento lo mi entrega mi bida na Cristo, pasobra e
oportunidad ey no ta priminti na ningun hende.
E decision ta awor cu bo ta na bida, pa bo mes scohe y biba pa Cristo, y ser un fiel sirbido.
Sinceramente, Pastor Marcel Balootje..
