Ta hala aden bèk e rekorte di 12,5% riba salario

Ta hala aden bèk e kondishon di rekorte di 12,5% riba salario di e paisnan Aruba, Kòrsou i Sint Maarten. Asina Konseho di Minister di Reino a disidí awe. E rekorte tabata un di e kondishonnan pa e paisnan Aruba, Kòrsou i Sint Maarten pa por risibí sosten di likides di Hulanda durante periodo di corona.

Na 2020 e paisnan a hasi un yamada na Hulanda pa ayudo finansiero. Komo konsekuensia di e pandemia di Covid un gran parti di entrada di gobièrnu i sektor privá a kai afó. E kondishonnan di Hulanda tabata enserá un rekorte di 12,5% pa trahadó den sektor (semi) públiko i 25% pa polítiko i tabata konta riba e pakete total di kondishonnan di labor. Ku e rekorte a duna un kontribushon importante na redukshon di e défisit finansiero ku a surgi i alabes sektor públiko a mustra solidaridat ku e sektor privá ku tabata sufri pisá a konsekuensia di e pandemia.

Mientrastantu e pik di e pandemia a pasa i turismo ta rekuperando riba e islanan. Dor di esaki na 2023 por trese e entradanan di gobièrnu bèk na e nivel ku e tabata promé ku e pandemia. Kolegio Supervishon finansiero (di Aruba) a konsehá Konseho di Minister di Reino ku ta posibel pa e paisnan bolbe kumpli ku e normanan di presupuesto na 2023. Pa e motibu aki e paisnan no ta hasi un petishon nobo na Hulanda pa sosten finansiero i nan mes por mantené e redukshon di nan propio presupuesto.

Un otro kondishon di Hulanda tabata e ‘normering van topinkomens’ den sektor (semi) públiko. Tur tres pais a regla esaki den lei. Sekretario di Estado di Asuntunan Interior i Relashonnan den Reino, Alexandra van Huffelen: “Mi ta kontentu ku e paisnan a krea espasio pa redukshon di e rekorte; ya asina por trese e entrada di por ehèmpel trahadó den sektornan importante manera kuido i enseñansa bèk na e nivel di promé ku e pandemia. Esaki ta spesialmente importante pa motibu ku den e parti Karibense di Reino tambe ta sinti e doló di e inflashon ku a krese drástikamente komo konsekuensia di e guera na Ukrania. Den kombinashon ku e rekorte salarial a tacha e forsa di kompra drástikamente. Esaki en partikular ta mishi ku e entradanan mas abou i awor por parti por kita esaki.”