Ta hala aden bek e recorte di 12,5% riba salarionan

E condicion di recorte di 12.5% riba salarionan di e paisnan Corsow, Aruba y Sint Maarten a keda hala aden. Esey e Conseho di Minister di Reino a dicidi awe. E recorte tabata un di e condicionnan pa e paisnan Aruba, Corsow y Sint Maarten pa ricibi sosten di liquides durante Corona for di Hulanda.

Na 2020 e paisnan a apela serca Hulanda pa ayudo financiero. Pa motibo di e pandemia di Covid un gran parti di e entradanan di gobierno y sector di comercio a cai afor. E recorte tabata conta pa 12.5% pa trahadornan den sector (semi) publico y 25% pa politiconan den servicio y tabata conta pa e pakete total di condicionnan laboral. E recorte aki a aporta considerablemente na e reduccion den e deficit financiero y tabata un acto di solidaridad cu e sector priva cu a sufri durante e pandemia di covid.

E pandemia mientrastanto a pasa su fase mas peor y turismo riba e islanan a demostra un recuperacion solido. Pa e motibo aki entradanan di gobierno na 2023 lo ta na mesun nivel cu prome cu e pandemia. Colegio di Supervision Financiero (C(a)ft) a conseha Conseho di Minister di Reino, cu ta posibel pa e paisnan cumpli cu e requisitonan presupuestario na 2023. E paisnan consecuentemente no ta pidi Hulanda sosten di liquides mas y por mantene e reduccion gradual den nan propio presupuesto.

Un otro condicion tabata e ‘normering van topinkomens’ den sector (semi) publico. Esey ta regla pa ley mientras tanto den tur tres pais. Secretario di Estado pa Asuntonan Interior y Relacionnan di Reino Alexandra van Huffelen: “Mi ta contento cu e paisnan a crea espacio pa e reduccion di e recortenan, paso cu esaki e entrada di por ehempel empleadonan den sectornan importante manera cuido y educacion lo ta na mes un nivel cu prome cu e pandemia. Esaki ta importante principalmente paso e inflacion cu a subi fuertemente, causa pa e guera na Ucrania tin su efecto tambe riba e parti Caribense di nos Reino. Esaki combina cu e recorte salarial a afecta e poder di compra fuertemente. Y mas ainda e salario di esnan cu ta gana menos, di e forma aki ta spera di coregi esaki bek.