Minister mester stòp ku mentira
Pa evitá oumento di preis pa pueblo
Nos ta mira ku minister di finansa ta lanta publika den medio sosial tokante debe di kompania Curoil na Gobièrnu di mas ku 80 mion na impuesto OB. Esaki a lanta konsternashon den komunidat kaminda gobièrnu lo kier bai eksonera Curoil di debe. Pero un biaha mas e kinister ta trose e berdat i ta engaña nos komunidat.
Konseho di Minister tuma desishon di prinsipio i manda e karta di petishon di Curoil pa tantu WJZ komo Sektor Fiscale Zaken pa duna konseho. Konsiderando negosashonnan kual tabata tuma luga pa un operador nobo riba termino korto lo mester a konklui i mas aun e impakto ku pago di impuesto di importashon riba e produktonan konserni, gobièrnu a duna enkargo na su departamento nan huridiko pa prepara e kambio di lei i asina tur produkto ku Curoil mester a importa tambe kai bou di tarifa di 0%.
Curoil den su karta fecha 16 di september 2019 dirigi na RvM ku petishon pa laga e 0% di impuesto di importashon kual tabata aplikabel riba LSD i ULSD tambe konta pa importashon di tur otro produkto di kombustibel ku Curoil mester a importa pa falta di operashon di Pdvsa / ISLA di nos refineria.
Atministashon di Aduana, korektamente konsiderando ku mientras nan no risibi e kambio di lei ofisial ku forsa retroaktivo di impuesto, a sigui faktura Curoil impuesto di entrada riba tur produkto ku Curoil mester a importa. Curoil no tabata paga esakinan debi na desishon di prinsipio di RvM ni tampoko tabata pasa e fakturanan di Aduana pa BTP pa esakinan keda inklui den kalkulo di preis di kombustibel pa merkado lokal.
Finalmente, ta bon pa trese dilanti ku entrada di impuesto riba importashon di kombustibel pa konsumo lokal nunka a forma parti di entrada pa presupuesto / kaha di gobiernu durante mas ku 100 aña. Pues manera ta bisa na hulandes no tin asuntu di “derving” pa entrada di gobiernu.
MAN / PIN ta urgi gabinete Pisas 2 pa laga su departamento nan huridiko (WJZ i Sector Fiscale Zaken) huntu ku Hefe di Aduana kaba di traha e kambio di lei manera suplika foi 2019 via di Aanschrijving i denter di un periodo di 6 luna despues presenta e Kambio di Lei pa Parlamento pa esaki drenta na vigor ku forsa retroaktivo te 2019.
Nos di MAN/PIN kier pa Minister di Finansa bin parlamento i duna kuenta i rason na pueblo riba eksonerashon di mas ku 3 miar di impuesto ku ta kontra lei. E akto aki ta un perhudikshon di pueblo. Stop di skonde i no kier bin duna kontesta riba pregunta di parlamento ku kua lei Minister a duna òrdu pa duna “kwijtschelding”.
