Ta detené indokumentanan den area di Ostpùnt

Wardakosta huntu ku Kuerpo Polisial Kòrsou ayera mainta a detené algun indokumentado riba tera. Wardakosta a detektá e boto sospechoso den oranan di mainta, na momentu ku esaki tabata nabegando bai direkshon di Ostpùnt. Mes ora despues di a detektá e boto, e Sentro di Operashon Marítimo di Wardakosta a manda un patruya di tera ademas di e helikòpter di Wardakosta den direkshon di e sitio. E notifikashon di e supuesto bahamentu na tera tambe a keda mandá pa KPC.

Durante e búskeda a detené sinku indokumentado i a konfiská un kantidat di arma i dos pakete ku supuestamente ta kontené droga. Ayera mèrdia Wardakosta a laga e helikòpter i avion di Wardakosta patruyá den e área en buska di mas persona ku tambe a baha na tera; pero e akshon aki no a duna ningun resultado.