Ta bon pa recorda cu e trabao di un Parlamentario ta entre otro encera e control di Gobierno, y pa siguramente hala nan debido atencion respectivamente na momento cu algo no ta canando manera debe ser.
Parlamentario Miguel Mansur (ACCION21) a dirigi un carta na Prome Minister, Evelyn Wever-Croes – encarga cu maneho di personal di Gobierno di Aruba – cu caracter di urgencia y tambe hopi preocupacion. Fraccion ACCION21 tin un peticion pa aclaracion di un situacion delicado tocante e tema di integridad den nos aparato gubernamental, specificamente relaciona cu Departamento di Recurso Humano (DRH).
TA OTORGA HOPI PODER
Parlamentario Mansur ta subraya cu recientemente den su capacidad como miembro di Parlamento di Aruba, a tuma nota di e circulario ‘maatregelen tegen niet-integer gedrag’ (18 juli 2023, DRH no. 59787, 995/23) firma pa Minister-President y ademas tambe (den correlacion na dicho circulario) di un decision di Corte Comun di Husticia di Aruba, Corsou, Sint Maarten y Bonaire, Saba y Sint Eustatius (GS-183, 15 december 2005).
“Den e circulario menciona ariba, hopi poder ta ser otorga na Director di e Departamento di Recurso Humano (DRH) den cuadro di accionnan disciplinario y tambe atendencia cu comportacion ‘no integro’ di trahadonan publico,” e Parlamentario ta splica. HOF ta constata cu un persona cu a haci keho contra e actual Director di DRH a wordo persigui como reprasaya. Un aangifte a wordo entrega acusando e actual Director di DRH di aparantemente comete actonan castigabel y/of no integro, pero HOF no por a obliga Ministerio Publico persigui e caso.
‘ALGO NO TA KLOP’
Mirando cu e base di e correlacion entre e circulario y e decision di HOF ariba menciona, fraccion ACCION21 ta haya cu e sentimento real ta existi cu e actual Director no ta e miho persona pa por ta envolvi den consehonan y ehecucion di decisionnan tocante integridad. “Nos fraccion ta desea claridad y splicacion di Minister-President pa loke ta e ehempel cu un persona cu un reputacion dudoso por tin pa ehecucion di e maneho di Gobierno pa cu e tema di integridad.”
DUNANDO CONSEHO CONTRA LEY?
Considerando e hechonan di e caso, e Parlamentario ta cuestiona ta cuanto conseho e departamento bao direccion actual a formula cu tambe ta contra di ley? Fraccion ACCION21 ta para firme tras di e hecho cu personanan cu no ta integro, no por ta encarga cu maneho di integridad. Mansur: “Na ingles tin un dicho, ‘the fox guarding the hen house,’ cu ta describi e situacion actual na DRH.”
Parlamentario, Miguel Mansur na Prome Minister:
Finalmente, den e carta dirigi na minister president , e fraccion lo desea di sa si e premier tin plan pa reestablece confiansa den e Departamento di Recurso Humano, “of si sra. Wever-Croes ta di acuerdo cu un persona cuestionabel por sigui como Director di un departamento di Gobierno?”
Fraccion ACCION21 ta spera di por haya contesta di e mandatario mas pronto cu ta posibel riba e asuntonan aki cu ta puntonan hopi serio den loke ta integridad y su ehecucion.
