Manera ta bon konosí Frente Sosial Progresivo ( FSP)ta boga pa legalisá Cannabis medisinal aki na Boneiru. Presidente i lider politiko di nos organisashon politiko a entregá un karta ku e petishon aki na Sekretario di estado Knops pa legalisá e jerba pa Boneiru tambe meskos ku na Hulanda ta e kaso.
Despues di a profundisá mas den e materia a jega na e konklushon ku Cannabis rekreashonal tambe lo tin un balor inmenso pa nos isla.
E pandemia di Covid 19 tin mundu den su gara pa basta tempu , e peliger ku e virus aki a kousa ta grandi , e daño ekonomiko i sosial ta inmenso.
Hopi ta e islanan den Karibe ku ta depende di e industria di turismo.
Tur ku di un otro forma ta biba di turismo a , ta i lo sinti un perdida di entrada nunka visto den historia di e sektor aki . No tin un bista ki dia i kon e industria aki lo rekuperá i kon e turismo nobo aki lo ta .
Un bia mas por a sinti kon fragil un ekonomia basá riba un solo pilá ekonomiko ta.
E krisis ku Venezuela ta den tambe tin su efekto riba islanan ABC .
PdVSA ta den problema serio i esaki tin su efekto riba Bopec ku logikamente tin su impakto negativo pa Boneiru.
Pues e industria di turismo i petroli ta bou di preshon i ta den krisis , negoshi ta bai malu , no tin ganashi i esaki na su turno tardi o tempran lo nifiká perdida di kupo di trabou i impuesto pa gobiernu.
Hopi ta esnan ku a papia di diversifikashon di nos ekonomia , pa un o otro motibu ainda esaki no a kristalisá.
Boneiru por sigui ehempel di hopi pais na mundo ku a legalisá Cannabis i mira kon esaki a benifisiá e komunidat positivamente.
Cannabis ta un mata ku hopi potensial esaki por krea un sektor ekonomiko nobo , ku tin un futuro briante su dilanti.
FSP ta konvensí ku ta ora pa kana e trajekto pa legalisá Marijuana , no tin diskushon pa ku e balor medisinal di e jerba , esaki pa hopi tempu ta sientifikamente probá kaba .
Awo ta ora pa bai pa esun rekreativo ku tin hopi benifisio pa e produktornan i tambe komersio. Pues mester planta i eksportá e produktonan derivá di e mata , logikamente tantu konsumo lokal i eksportashon ta bai kontrolá pa intansianan ofisial. Aki nan ” FSP ta Apresia ku tin mas organisashon (Fundashon) a lanta pa hiba e lucha pa legalisa Cannabis den su totalidad.”
Un estudio ofisial na Aruba ta bisa ku cannabis medisinal por krese e Pais su ekonomia ku 10 porsiento. Ront mundo tin paisnan ku a mira nan ekonomia krese despues di legalisashon di produkshon i konsumo di e mata aki.
FSP ta di opinion ku Marijuana ta E remedi pa hende pero tambe pa nos ekonomia Boneriano. Awo ta ora pa eksihi legalisashon di Marijuana pa Boneiru tambe i no pa Hulanda so. No por sigui pensa malu i antikuá i laga e oportunidat di oro aki bai perdí .
E perdida di entrada okashoná pa e krisis petroli i e pandemia di e virus di corona ta un realidat ku Boneiru ta eksperensiando.
Nos por sigiu bringa , lucha i pretendé ku konseptonan ekonomiko ku nos konosé kaba o buska moda di bai ku tempu i aseptá e bondat medisinal i ekonomiko di cannabis.
FSP lo para fuerte pa e trajekto di legalisashon di cannabis rekreativo ku ta kanando na Hulanda ta aplikabel pa Boneiru tambe.
Nos tin tera , solo i awa , esaki ta e kondishonnan priomordial pa produkshon di Marijuana di bon kalidat , pues ta ora pa lanta i brasa e oportunidat di oro aki.
Tur shimaruku ta hechu , basta ku nos liberá nos mente di tabunan , hopi biaha politikamente o ekonomikamente fabriká , i mira e realidat i pontensial medisinal i ekonomiko ku cannabis ta representá.
Tantu Aruba komo Korsou ta trahando riba e produkto i sektor nobo aki den Karibe Hulandes , pues Boneiru tin ku move pa atrobe nos keda tras i jora malai . E komunikado aki ta di Presidente di Frente Sosial Progresivo , Renny Winklaar
Ta boga pa legalisá Cannabis medisinal na Boneiru
