Ta bai renoba kaya korona

Riba enkargo di entidat públiko Boneiru (EPB), Bonairiaanse Wegenbouw Maatschappij (BWM) lo start ku renobashon di Korona riba 24 di yüli. Lo hasi su fundeshi mas sólido, na ámbos banda e kaminda lo haña rant di betòn i alsera. Ta ehekutá e trabounan di renobashon for di Kaya Karpitan te na Mentor (Kaya Caribe). 

Ta repartí e trabounan den 3 fase i nan lo dura en total 4 luna. 

Fase 1 ta kore di Kaya Karpitan te na Kaya Gramèl. Fase 2 ta kore di Kaya Gramèl te na Kaya Kabikuchi, fase 3a di Kaya Kabikuchi te na Kaya Barakuda i e último fase, 3b, ta kore di Kaya Barakuda te na e krusada di Mentor. EPB lo informá tur hende tokante seramentu temporal di kaya pa medio di aviso den korant i su páginanan di Facebook. E negoshinan ku ta keda na Kaya Korona lo keda alkansabel a traves di desviashonnan.

Infrastruktura i partikularmente mehorashon di nos kareteranan ta un punto di lansa grandi di diputado Thielman. “Kaya Korona ta un kaya prinsipal ku hopi tráfiko. P’esei nos ta kontentu ku nos por inisiá e trabounan di renobashon di e karetera akí. Pronto nos lo kuminsá tambe ku renobashon di un otro kaya prinsipal. Esta Kaya Gobernador Debrot. Tin muchu mas karetera ku nos mester asfaltá. E kuater añanan benidero nos ta  bai duna prioridat na e kayanan di tera den e barionan. Finalmente nos ta esfuerso ta pa tin kayanan bon i sigur, riba kua nos tur por kore ku plaser.”

Durante e konferensia di prensa relashoná ku e renobashon akí, direktor di R&O, Roy Martina, a splika kòrtiku kon pa 2023 e plan pa drecha kareteranan ta hinká den otro. Entre 2023 i 2027 lo duna mas atenshon na dunamentu di kapa duru duradero na kamindanan di tera den e barionan i asfaltá nan. Pa esaki lo apliká téknikanan inovativo ku ta skapa tempu, ta mas barata i bon pa nos naturalesa. Tambe ta tene kuenta ku entre otro drenahe i konstrukshon di alsera. E kayanan den Antriol ku ta inkluí den e planifikashon di e promé fase ta: Kaya Helena, Kaya Rita, Kaya Johana, Kaya Ramona, Kaya Imelda, Kaya Modesta, Kaya Rita, Kaya Dominga i un parti di Kaya Maria. Den Tera Kòrá: Kaya Felipe Clarinda. Na Republiek: Kaya Rubi. Na hato: Kaya Haarlem i Kaya Den Haag. Den Playa: Kaya Londres, Kaya Cypres, Kaya Slovenia i un parti di Kaya Hulanda. Na Belnem: Kaya Luna, Kaya Solo, Kaya Strea i Kaya Venus.