Celebracion di 75 aña di SV Dakota ta den full swing, Gilmar Croes ta presidente di SV Dakota y ta kere ta importante pa e historia di SV Dakota keda treci padilanti pa Aruba y e generación nobo. Dia 15 di Juli 1947 Sr. Momong de Castro den felis memoria a funda e organizacion di SV Dakota. Despues di esaki SV Dakota tabatin un trayectoria cu momentonan bon y otro momentonan menos bon, pero e importancia di esaki ta pa sigui lucha y crece y esaki ta loke cu a tuma luga tambe.
Sinembargo historia ta papia pa su mes unda cu Dakota tin 16 titulo di campeon riba su nomber desde cu e ta forma parti di e futbol di AVB. Awe por mira un biaha mas Dakota ta para fuerte cu su team y lo hunga nan wega diarason awo dia 22 di juni 2022 contra di RCA. Otro team di hobenan cu lo forma parti di e historia di Dakota y si nan haci nan best lo ta marca historia den e celebracion di 75 aña di SV Dakota pa ta campeon y lo celebra dobel den esaki.
Na e momentonan aki SV Dakota ta na un crusada importante di desaroyo general como organizacion. Manera tur hende sa dia 15 di juli SV Dakota ta celebra 75 aniversario y tin un rifa pa un auto di solamente 5 florin y e meta di e rifa ta pa por haci cambionan riba e veld di SV Dakota pa e muchanan tin un miho veld pa hunga y train. Esnan cu kier aporta por yama libremente presidente di SV Dakota Gilmar Croes na 5944024.