Ultimamente varios persona a acerca mi tocante e problematica di examen den enseñansa secundario. E cuestion ta trata tocante e docentenan cu no a logra caba di duna e materia, debi na e crisis ocasiona pa e pandemia di Covid-19. Pero tambe ta inclui e instancianan concerni, cu ta keda exigi cu cierto parti di materia (cu no a wordo trata cu e studiantenan) mester ta den e examen, pa mantene e calidad di examen. Un situacion dificil y fastioso, pero sigur nos mester atende cu urgencia y den trahamento hunto, paso e pregunta final lo ta: Con ta para cu e studiantenan cu si mester traha e examen concerni?
E Hoben
Aki un biaha mas nos ta mira cu tin trabou pa haci den comunicacion, e procesonan y tumamento di decision den e veld di enseñansa. Cu e situacion aki ta pone un stress riba e studiante hoben, cu mester traha su examen, no ta yuda e hoben pa nada den su autosiguridad, autoestima, autodeterminacion y motivacion pa traha su examen. Stress riba e hoben, cu lo por conduci na traha e examen malo, no obstante si a haya tur e cantidad di lesnan necesario of no. Stress riba e hoben, door di presion di e.o. mayor y scol, meymey di un pandemia ocasiona door di Covid-19.
Como educador nos mester compronde cu nos no a sali for di e crisis aki ainda y cu esaki ta afecta e hoben tambe den tur sentido di palabra. Stress riba e hoben, pasobra kisas esaki ta su ultimo oportunidad pa obtene un diploma den su man. Esaki no ta aceptabel, pasobra e hoben no tin culpa di un sistema cu a faya nan. Esaki ta otro muestra cu a yega tempo pa cuminsa mira otro forma di sistema di enseñansa na Aruba. E formanan cu ta motiva e hoben pa studia, en bes di bisa nan cu nan no por, pasobra motivacion ta un aspecto hopi importante den proceso di siñamento di un hoben. E formanan cu ta duna relevancia na enseñansa y formacion di e hoben y cu ta prepara e hoben adecuadamente y debidamente pa bida.
Comunicacion y e Procesonan den Nos Sistema Actual
Pa loke ta trata e comunicacion y e procesonan den enseñansa, cada actor tin cu carga nan debido responsabilidad. Desde e docente te na minister di enseñansa. Pa esaki ta rekeri bon comunicacion, cu ta un di e habilidadnan primordial di siglo 21. Ademas e ta rekeri responsabilidad “accountability” di cada actor, ora di tuma cierto decision. Pa esaki mester delinea, restructura of reinforsa e procesonan den enseñansa pa mitiga of pa hamas tipo di e casonan asina tuma luga.
MEP den e Proximo Gobernacion
Den e proximo gobernacion di MEP kier crea un colegio di conseho di enseñansa primario y secundario (onderwijsraad), cu ta sali na vanguardia di e interes, privilegio y derecho universal di desaroyo holistico di e mucha y hoben/adulto pa evita cu dicho situacion ripiti.
MEP lo boga pa tin e structuranan cu ta stimula plataforma di dialogo entre e actornan necesario, manera; colegio di consulta di enseñansa, e directivanan di scol, SIMAR, Departamento di Enseñansa di Aruba, Inspectoria di Enseñansa y percura pa e.o. e procesonan ta bon delinea, bon comunica y principlamente salvaguardia y cu cada actor ta carga nan debido responsabilidad na beneficio di e studiantenan.
