Ta suavisá medidanan di corona awor ku e kantidat di kontagio a baha i hospitalisashon a bira ménos. E suavisashon ta na vigor di 4 di febrüari te 18 di febrüari 2022. Den e periodo akí ta keda obligatorio pa bisti un tapaboka den espasio públiko i e regla pa tene 1,5 meter di distansia ketu bai ta keda na vigor.
Na enkuentronan privá, maksimalmente 25 persona por ta presente, no ta importá di kuantu kas ta trata. Pa entiero i kasamentu ta konta un máksimo di 50 persona. Ta posibel pa hasi deporte paden sin públiko. Ta permití evento deportivo den aire liber ku públiko, ei por usa 75% di kapasidat. E reglanan básiko ta keda na vigor pa skol i tambe pa pasadia pa hende grandi.
Ta permití evento den aire liber ku un máksimo di 50 persona, kaminda ta hasi uso di 50% di kapasidat di e espasio. No ta permití kanta òf balia. Wéspetnan mester tin un asiento fiho. Den e periodo di 4 te 18 di febrüari 2022 no ta permití evento paden. E konseho na iglesianan ta pa tene misa i sirbishi digitalmente sino usa 50% di kapasidat. Ora baidónan di misa ta bishitá un misa òf sirbishi den un edifisio, e konseho ta pa no kanta.
Restorant i bar por keda habrí te 00:00 or, wéspetnan tin un asiento fiho i nan no mag balia òf kanta. E suavisashon ta konta tambe pa restorant i bar na hotèl. Kasino i sine por ta habrí te 00:00 or, nan por usa 50% di kapasidat. Establesimentunan di sèks por habri atrobe. E establesimentunan akí tin regla pa protehá siguridat di nan bishitantenan i personal. Sauna por usa 50% di nan kapasidat.
Pa profeshonnan di kontakto ta obligatorio pa durante trabou bisti un tapaboka. Ta hasi un yamada na dunadónan di trabou pa den e periodo di 4 te 18 di febrüari 2022 laga nan personal traha mas tantu posibel for di kas. Tambe ta konsehá ku insistensia pa laga airu pasa regularmente den lugánan di trabou òf sitionan kaminda hende ta bini huntu.
Bo tin keho? Hasi un tèst propio òf yama 0800 0800 pa traha un sita pa tèst. E resultado di bo tèst propio ta positivo? Bolbe tèst e ora ei na Salubridat Públiko pa ta sigur ku bo tin corona. Semper bo mester warda resultado di e tèst di e kaya di tèst na kas.