Hóbennan boneriano ku ta studia pafó di Boneiru i ku ta biaha bèk pa Boneiru,
entrante 1 di yüli no tin mester di paga e Visitor Entry Tax (impuesto di turista) ora nan ta studia
konforme e Lei di finansiamentu di estudio BES (Wsf BES).
Dia 12 di aprel 2022 Konseho Insular a stipulá esaki den e ‘Ordenansa di Impuesto di Turista’.
E departamento di finansiamentu di estudio di Rijksdienst Caribisch Nederland ta manda un
‘Deklarashon pa dispensashon di impuesto di turista Boneiru’ pa tur studiante ku ta bini na
remarke pa esaki. Asina e studiantenan akí por mustra ku nan ta studiante di BES. Mester mustra e
deklarashon na yegada na Boneiru.
Mayoria studiante ku ta studia konforme e Lei di finansiamentu di estudio BES (Wsf BES) òf ku ta
kai bou di e finansiamentu di estudio hulandes, pero ku sí a haña un kompensashon inisial for di e
finansiamentu di estudio BES, entre tantu a risibí e deklarashon akí via email. E deklarashon akí ta
bálido pa 3 luna. For di e aña akadémiko nobo lo manda e deklarashon tur aña pa e studiantenan.
Kon esaki ta bai?
Mayoria hóben ku a bandoná Boneiru pa bai biba otro kaminda pa nan estudio, mester a inskribí
nan mes na nan lugá di biba nobo. I pa e motibu akí nan no tin un sédula bálido di Boneiru mas.
Si bo tabata biba na Boneiru i bo a bai studia pafó di Boneiru ku finansiamentu di estudio BES, e
ora ei outomátikamente via email nan ta manda e ‘Deklarashon pa dispensashon di impuesto di
turista Boneiru’ pa bo. Prent e deklarashon akí i bai kuné ora bo ta biaha bèk pa Boneiru. No
lubidá pa promé ku bo biaha, registrá bo mes via e wèpsait bonaireisland.com, pa bo haña un QR-
code. Ku e QR-code akí i bo deklarashon bo por mustra ku bo ta studiante di BES i ku bo no tin
mester di paga e Visitor Entry Tax na yegada na Boneiru.
Bo no a risibí e deklarashon promé ku 1 di yüli via email, pero dentro di poko bo ta biaha pa
Boneiru sí? E ora ei wak pa mas informashon riba e página di Facebook di finansiamentu di estudio
di RCN (https://www.facebook.com/rijksdienstcaribischnederland.studiefinanciering)
Studiantenan di Boneiru ta haña dispensashon di e Visitor Entry Tax via email
