WILLEMSTAD, Curaçao
For di 14 di ougùstùs 2020 Edelmir Stokkel a bira e komandante nobo riba e cutter Jaguar di
Wardakosta na Kòrsou. Stokkel ta e promé yu di Kòrsou ku lo nabega komo komandante riba e
cutter Jaguar. Stokkel a kuminsa su karera na Wardakosta na momentu ku Milisia Antiano
(awendia Milisia di Karibe) a traslad’é pa Wardakosta. Na Wardakosta e la kuminsa komo
“vlootoperator” abordo di e P-boot i e botonan “inshore”. Ora a introdusí e cutternan na
Wardakosta e la subi abordo di cutter Jaguar komo “matroos”. Na 2003 Stokkel a biaha pa St.
Maarten kaminda e la traha komo “chefdek” na bordo di e cutter Poema di St. Maarten. Na 2010
e la regresá bèk Kòrsou den e funkshon di “2de wachtofficier” i despues di algun aña komo “1ste
wachtofficier” riba e cutter. Na diferente okashon e tabata biaha pa St. Maarten pa traha komo
“1ste wachtofficier” riba e cutter Poema, pa Stokkel St. Maarten ta su di dos kas.
Edelmir Stokkel ta tuma e mando di e cutter for di señor Van Roosmalen. Van Roosmalen
tabata e komandante riba Jaguar entre 2017-2020 i e ta bai pa un otro reto nobo den
Wardakosta. Durante e seremonia di traspaso di komando Van Roosmalen a gradisí e tim di
Jaguar pa e bunita tempu trahando ku nan riba e cutter di Wardakosta. E la desea Stokkel i su
tim hopi eksito. Den e spich di direktor di Wardakosta saliente, Peter Jan de Vin e la bisa: “esaki
ta mi último dia ofisial komo direktor di Wardakosta di Karibe, pami ta un honor kumi por asistí
na e seremonia di traspaso di komando aki pa Stokkel, un yu di Kòrsou ku ta tuma e komando
di e cutter Jaguar. Mashá pabien Stokkel i hopi eksito. Jaguar tabata e último cutter ku tabatin
un komandante hulandes ta nabegá. Riba e otro dos cutternan kual ta Panter na Aruba i Poema
na St. Maarten, tin Arubiano ta nabegá. “Van Roosmalen, danki pabo trabou riba Jaguar. Den
bo funkshon nobo abo ta bai skibi hopi plan, rapòrt i otro dokumentonan. Loke bo ta bai hasi ta
di importansia pa Wardakosta. Mi ta desea bo hopi eksito kubo funkshon nobo”; asina Peter Jan
de Vin, direktor di Wardakosta di Karibe saliente a terminá su spich.
Stokkel a desaroya su mes último añanan den e organisashon di Wardakosta, dediká hopi
tempu na bukinan di estudio i bringa pa e logra haña e funkshon di komandante di cutter.”Mi a
logra e reto aki dor di kai, lanta, para i sigui. Pami awe ta un honor kumi por tuma e komando di
Jaguar”; asina Stokkel e komandante nobo riba cutter Jaguar a bisa den su spich durante e
seremonia.
