Minister di Husticia, Siguridad y Integracion, mr. Andin Bikker ta orguyoso di anuncia cu dia 1 di maart ultimo, Seraida Pemberton, director di Stichting Reclassering en Jeugdbescherming Aruba, a celebra cu 25 aña pasa el a drenta den servicio di Gobierno di Aruba. El a sa di crece den su trabou y cu un carera impresionante awe e ta dirigi un fundacion masha importante den comunidad.
Diariamento e fundacion ta den contacto estrecho cu Corte, Ministerio Publico, Polis, Voogdijraad y varios otro instancia oficial, den cuadro di nan rol pa yuda resocialisa esunnan cu cay den man di husticia. Pa e fundacion ta un orguyo grandi ora mira ex-clientenan logra rehabilita despues di cumpli cu un castigo y sigui riba un bon caminda, liber di problema cu husticia.
Claro como e director, Seraida Pemberton ta hunga un rol importante pa tene e fundacion hunto, percura pa un operacion eficiente y riba dje, logra exito den bida di esunnan cu pa un motibo of otro a comete un eror. E añanan cu el a dedica na su trabou, ta conta cu hopi aprecio di henter comunidad y Minister Bikker ta masha orguyoso di esaki.
Na mei 1961 a funda Arubaanse Stichting voor Reclassering en Kinderbescherming 1961, riba insistencia di clero, Ministerio Publico y Voogdijraad. E pensamento ta cu tur hende tin derecho di por cambia despues di comete un eror. Reclassering ta haci tur lo posibel, den cooperacion cu husticia, departamentonan di gobierno relevante, instancianan particular y e cliente pa un proceso di resocialisacion, rehabilitacion, sosten y reintegracion den comunidad. Reclassering ta situa den Caya Ernesto Petronia 21-C na Oranjestad.
