e molester di holo a bira constante
Habitantenan di barionan di Mahuma, Buena Vista, Parkietenbos y Simeon Antonio a acerca Stichting Parkietenbos pa reclama encuanto e holo malo y posibel gas toxico cu por ta afectando e habitantenan di e barionan continuamente. Especialmente durante e lunanan cu biento ta cambia e famianan ta reclama cu nan ta haya efecto di tres area, Ser,I Teishi, Barcadera y Dump di Parkietenbos.
Ademas e habitanetanan a pidi pa recorda Gobierno cu nan a firma pa cera no solamente e dump di Parkietenbos pero tambe pa stop e deramento di sushi na Seri’ Teish. Tambe den e manifiesto entrega a urgi pa bay over na uza sistemanan mas moderno di procesa desperdicio y cu no ta causa tanto molester pa e habitantenan y afecta nan aire di hala rosea cual ta esencial pa biba cu un bon salud.
Durante di e ultimo tres lunanan cu a pasa e molester di aire contamina un biaha mas a intensifica y habitantenan ta lanta mainta trempan caba cu holo malo.
Fundacion Parkietenbos a manda dos carta caba pa Minister Ursell Arends, sinembargo despues di 4 luna ainda nan no a haya un contesta o reaccion. Awor nan a didici pa manda un carta pa Minister President Sra. Evelyn Wever Croes urgiendo e promer mandatario pa considera e situacion un Crisis y pa envolvi e Oficina di Maneho di Crisis pa tuma over e situacion.
Stichting Parkietenbos kier informa e habitantenan di e barionan y comunidad di Aruba engeneral cu durante e prome Gabinete Wever Croes miembronan di e fundacion a participa na un serie di reunionnan importante cu tur stakeholdernan envolvi incluyendo DNM, DVG, WEB y TNO, pa asina planea con ta bay soluciona e problema di maneho di desperdicio pa Aruba. Despues di intercambio cu multiple expert, a bay di acuerdo pa despues cu cera Dump, pa solamente un periodo temporario di 2 aña por
dera desperdicio na Seri’ Teishi y despues implementa sistemanan mas moderno y controla, cu menos molester y daño Ambiental pa e besindario. Ademas e tipo di practicanan aki di dera disperdicio comprimi bao di suelo no ta permiti den otro paisnan pa motibo di e daño cu esaki ta causa na e subsuelo y contaminacion di e aire y medio ambiente.
Na aña 2020 casi 2000 habitante di e barionan concerni a firma pa apoya e solucionnan proponi y un manifiesto a keda entrega na Gobierno. Sinembargo apesar di a cera Dump, awo e molester a bira mas constante y for di varios direccion mientras cu no ta hayando reaccion di Minister concerni. E habitantenan obviamente hopi preocupa, no kier mira un siguiente capitulo di Dump di Parkietenbos ripiti su mes na Seri Teishi of cualkier otro area den e besindario. Hopi ta e famianan cu tin un of mas miembro cu a bira malo y hasta cu a fayece a consecuencia di e aire contamina cu ta afecta e barionan aki pa tanto aña caba. Hala rosea di aire limpi ta un derecho humano proclama pa United Nations.
