Stichting BOB Aruba cu ta responsable pa screening di pueblo di Aruba pa detecta cancer di pecho lo mas tempran posible, kier desea pueblo di Aruba un feliz y prospero aña 2021. Tambe ta desea di informa pueblo cu nos fundacion a muda desde 1 dec 2020. Den nos establecimento nobo na Caya dr. J.E.M. Arends 17, nos ta sigui cu nos servicio di screening di pecho conhunto cu nos protocol di salud y higiena.
Den e aña aki ta sumamente importante pa tur participante di e programa di screening di pecho, ta na altura cu Stichting BOB Aruba su protocol di higiena ta cumpli cu tur precaucion cu ta wordo conseha door di DVG. Di e manera aki nos ta ofrece tur participante un ambiente agradabel y sin riesgo adicional.
E presidente di Stichting BOB Aruba, señor Stefan Lucas ta contento di ricibi nos Minister president sra. Evelyn Wever Croes y sra. Hannekke Boekhoudt kendenan lo corta e cinta y haci e inauguracion oficial riba día 12 di januari 2021.
Stichting BOB Aruba kier gradici tur hende cu a yuda Stichting BOB Aruba yega na e establecimento bunita, bon ekipa y pa den e manera aki nos por sigui duna e servicio di screening cu ta detecta cancer di pecho mas tempran posibel.
Nos ta gradici e familia di sra. Jeanne Ecury (q.e.p.d) pa ta e prome artista cu ta expone diferente obranan di arte pa decora nos edificio. Artistanan cu lo desea expone nan obra di arte den nos edificio ta wordo invita pa tuma contacto cu nos.
Stichting BOB Aruba kier remarca cu nos a cambia nos moda di haci afspraak. Na e momento aki nos no ta mandando invitacion cu carta mas. Pa es motibo Stichting BOB Aruba ta invita nos cliente nan mes tuma iniciativa y tuma contacto pa traha un cita.
Ta importante pa sigui conscientisa pueblo di Aruba tocante nos programa di screening di pecho. Screening pa cancer di pecho na Stichting BOB Aruba ta un programa subsidia door di AZV, caminda e hende muhernan entre 45 cu 75 aña cu tin carchi AZV valido, por atende cada 2 aña gratis.
Nos kier sigui enfoca riba conscientisacion y e importancia di deteccion di cancer den pecho lo mas tempran posibel.
Durante e periodo di COVID hopi participante no a logra traha nan cita. Stichting BOB Aruba ta hunga un rol grandi den deteccion tempran di cancer den pecho.
Nos ta haci un yamada na e hende muher pa tuma contacto cu Stichting BOB Aruba y traha su cita.
Awor Stichting BOB Aruba ta ubica cerca hospital HOH, na Caya dr. J.E.M. Arends 17.
Stichting BOB Aruba ta mas accesibel pa cliente nan cu ta bin cu bus.
Pa traha cita por tuma contacto cu nos via telefon 588-1212, via number di WhatsApp 594-5020
