St. Paulus School e aña aki ta organisando su marcha cultural. Trabaonan ta andando pa tin tur e bunita trabaonan di cada hoben riba caya. Na aña 2018 a bin prome biaha cu e idea pa haci algo diferente pa dia di Himno y Bandera. E proposicion tabata pa ban subi caya y haci algo unda cu ta promove cultura riba caya.
Director di St. Paulus School Rendy Arends ta duna di conoce cu e prome stap tabata cu e grupo di Massive Brassband a percura di siña e muchanan toca brassband y asina por a subi caya y e comentarionan tabata hopi positivo. E siguiente aña a hacie mas grandi unda cu a busca musica tipico ya a subi caya. Despues den aña 2020 a prepara tur cos pero no a logra haci e evento debi na COVID tur scol mester a cera.
E aña aki e decision a caya pa haci e marcha bek, St. Paulus School ta haci esaki pa asina aporta, engrandece y aumenta e participacion di nos muchanan na actividadnan cultural. E berdad ta cu nos muchanan ta activo na hopi actividad , pero na esun di mas importante cu ta nan cultura ta mustra di no ta mucho atractivo pa nan.
Banda di esaki kier educa e muchanan di e historia y importancia di nos cultura, tambe kier haci e trabaonan di e muchanan mas accesibel pa pueblo di Aruba. Pa e motibo aki ta subi caya unda cu e pueblo lo presencia e trabaonan y e mensahe cultura den e parada. Tambe ta haci esaki pa engrandece e cultura door di duna e muchanan les na scol riba Aruba su cultura y su custumbernan na un manera structura.
Segun Director di St. Paulus School Rendy Arends via di e programa di certificacion program tin e permiso pa uza nan material unda cu e muchanan ta haya 6 siman di les riba tur e topiconan cu Aruba certificacion program ta ofrece y e muchanan por kies un tema y nan lo traha riba dje pa asina presenta esaki den e parada riba caya den diferente manera. Cada mucha lo trece nan manera creativo pa trece nan pensamento padilanti.
Tambe riba caya lo tin un obra di arte cu ta keda presenta pa e hobennan y esaki sigur ta algo hopi bunita pa mira. E invitacion ta keda pa mayornan y pueblo di Aruba pa nan bin admira e bunita trabaonan cu e muchanan y hobennan di St. Paulus School a traha riba dje. Lo ta bay tin mas of menos 200 mucha cu lo ta bay ta riba caya y trece e mensahe cultural.
E evento aki lo tuma luga diabierna awo 15 di maart y lo start pa 4 or di atardi Ta gradici UNOCA y ATA cu su plataforma cu yama BAN SERIO cu a yuda den henter e proceso aki.
