Na April 2023 Prome Minister tabata celebra firma e asina conoci ‘onderlinge regeling’ cu Hulanda cual ta reemplasa e consensusrijkswet COHO. Algo cu no a haya mucho atencion na Aruba ta hecho cu hunto cu desaparicion di COHO a bay 457 miyon euro cu Minister di Finansas di Hulanda a reserva riba prespuesto Hulandes desde januari 2021 pa e islanan CAS. Nos por asumi cu Aruba lo a haya mas o menos 1/3 di e fondonan cu ta representa 293 miyon florin pa reformanan structural. Kiko mester a entrega pa duracion di unicamente cuatro aña pa ricibi e fondonan? Somete nos mes na un organo independiente di tanto Gobierno Hulandes como Gobierno di Aruba (mescos cu CAft) pa supervisa ehecucion di e landenpakket.
MinPres ta argumenta cu ningun caminda den e ley ni tampoco e memorie van toelichting tabata papia di fondonan di inversion. Esey ta berdad, pero no ta den e ley of MvT mester a busca e fondonan di inversion pero den reservering riba presupesto Hulandes. E islanan BES a siña studia presupuesto Hulandes pa mira cuanto placa tin reserva pa nan. Gabinete Wever-Croes a fracasa den tanto identifica e fondonan di 457 miyon euro destina pa e islanan, como tambe negocia pa nan continuacion bao un onderlinge regeling. Accion 21 y un solo otro fraccion tabata na fabor di e rijkswet COHO representando 3 di 21 asiento den Parlamento. E otro tres fraccionnan den Parlamento (lesa MEP, RAIZ y AVP) a vota contra e rijkswet paso e ta mishi cu Parlamento su budgetrecht.
Awor den 36 aña di Status Aparte no tin un solo biaha cu Parlamento a eherce su budgetrecht, semper a pasa presupuesto di gobierno apesar di consehonan contra. Prespuesto 2022 a cuminsa cu un deficit di 291 miyon florin, a pasa cu un deficit di 227 miyon florin pa purba evita un recomendacion pa un aanwijzing. Despues bao mensasa di un KB porfin gobierno a dicidi di ehecuta e 9 cambionan cu CAft a pidi fe cuminsamento pa yega na un deficit di 143 miyon. Loke ta claro ta cu sin menasa di un aanwijzing, sin un KB ta colga riba cabes di gobierno cu lo inclui retiro di MinFIC, gobierno y coalicion MEP-RAIZ lo tabata mes iresponsabel cu placa di pueblo cu gobiernonan di pasado. Gasta placa (cu no ta di bo) ta mucho dushi paso asina bo ta gana voto y awe Aruba tin un debe di casi 6 biyon florin mas 1,2 biyon florin di pagonan pa haci relata na proyectonan PPP.
Nos a siña? NO, ainda un mayoria den Parlamento (lesa MEP, AVP y RAIZ) kier bringa e RAft. Perde 293 miyon florin den inversion no ta un sla suficiente duro pa pueblo di Aruba, awor nan kier nos paga interes mas halto tambe. Interes riba bono Hulandes di 10 aña ta na 2,7% cu nos por supone ta rond di loke nan lo financia e 915 miyon cu nos debe nan na oktober. Ultimo biaha gobierno a fia riba mercado local tabata na 6,5%. Tur hende por deduci cu refinancia via Hulanda ta cumbini nos pais. Tur hende honesto por constata cu nos gobernantenan no a haci un bon trabao manehando finansas publico durante e ultimo decadanan. Apesar di esey fraccionnan MEP, RAIZ y AVP ta sigui opone e RAft pa den futuro nan por bolbe gasta placa di pueblo cu smaak. Sentido comun ta e balor cu ta desaparece den politica emocional paso ainda mayoria di boso representantenan eligi kier pa pueblo paga mas den nan afan cu orguyo falso.
1 comment
[…] Source link […]