Recientemente, Departamento di Agricultura, Cria y Pesca conoci como Santa Rosa, a ricibi e bishita di Ir sr.Yoeri de Vries, kende ta Policy Advisor pa e Ministerio di Agricultura, Naturalesa y Control di Calidad di Alimento. Den pasado Sr. de Vries a bishita Santa Rosa y e biaha aki e tabata desea di haya un update ariba e desaroyo nan cu a tuma lugar y con e Ministerio Hulandes lo por aporta na e necesidadnan di Aruba su Sector Primario. Durante e reunion Sra. Nathalie Maduro Director di dicho departamento a duna un splicacion extensivo di kiko tur ta proyectonan y diferente estudio cu Santa Rosa a ehecuta y lo bay ta ehecutando den e proximo luna y aña. E la splica tambe ariba un convenio inter-insular entre e departamento nan conoci como DLVV tanto di Korsow, Boneiro y Aruba cual tin un comision cu ya ta den desaroyo pa asina crea un plataforma den cual e departamento nan por traha mas estrecho y crea un plan di maneho cu lo aporta no solamente na e desaroyo a corto, medio y largo plazo pa tur isla hunto lo sirbi pa crea un plan concreto y strategico como e mapa pa por brinda un seguridad di cuminda na tur tres isla den caso di cualkier calamidad of nececidad den futuro. E plan lo inclui aspectonan concreto manera, estudio, maneho y adaptacion di leynan cu e proposito pa facilita commercio entre e tres islanan sosten den forma di material of informacion pa menciona algun. Pa e Ministerio Hulandes esaki sigur ta un logro importante ya cu for di varios ana tin e deseo pa mira mas cooperacion entre e tres isla nan cu por brinda te hasta e oportunidad di exporta cualkier producto cu lo por wordo produci den un escala mediano of grandi, di acuerdo cu e clima y infrastructura cu cada isla ta conta cu ne. Durante e reunion tabata presente tambe Sr. Di-Angelo Schenker, Chef Financiele Zaken y Sra. Ingamara Reyes, Policy and Legal Advisor pa Santa Rosa.
Despues di e reunion, Sr. Ludwig Rasmijn, encarga cu e parti di Planificacion y Curso di Santa Rosa a prepara un programa completo di bishita. A hasi bishita na diferente proyecto y cada un representando e diferente sistema cu ta wordo implementa den e sector agrario na Aruba manera sistema tradicional cual ta den tera, sistema hydroponico y tambe a haya un bista ariba e potential plantacion di Pitaya (Dragon Fruit) y su potential pa bira un producto cu lo por wordo exporta pa resultado positivo cu a wordo demostra den volumen y exito den e cantidad di produccion.
E prome bishita tabata na Zong Garden caminda por a mustra e diferente sistemanan tradicional cu varios di e productornan Asiatico ta usa y hunto mira e importancia pa por tin un bon maneho ariba e control di calidad pa locual ta e uso di fertilizante, Insecticida, Pesticida y e maneho cu e producto despues di cosecha. E por a aprecia e sistema di plantacion cual ta den forma di raise beds (baki pa planta)) cual ta wordo uza diferente tipo di producto cu nan ta planta mas tanto y tambe e sistema di irigacion. Locual cu a resalta ta cu mayoria ta wordo maneha dor di famia.
Despues a bishita Sr. James Ramos kende ta un conocido Agricultor y Horticultor cu a duna Sr. de Vries un splicacion completo di su proyecto y e tipo di plantacion cu e ta manehando. Sr. de Vries a keda impresiona cu e plantacion y variedad di Pitaya y tabata tin hopi pregunta relaciona cu esaki, cual na Europa tambe e ta un producto hopi pidi apesar cu eta pa temporada. Diferente cu na Europa nos isla ta conta cu e clima perfecto pa por produci e producto aki den escala mediano of grandi ya cu e no ta rekeri hopi awa. Sr. de Vries a haya informacion di e diferente mata di fruta cu tin pa por bende e productonan fresco y su plantacion di diferente tipo di berdura local. Sr. de Vries a logra purba un dushi “Milon di Snechi” di e cunuco y tambe saboria 3 tipo di Pitaya cu Sr. Ramos mes a caba di cosecha. Hopi otro tipo di informacion a wordo treci dilanti e.o duracion di cosecha, temporada, y malesa.
Pa locual ta proyectonan mas moderno, a bishita e proyecto den container di 297Farm na Primavera cual ta e “Containerized Indoor Farm” di Sr. Fung A Fat. Eynan Sr. de Vries a haya un splicacion completo di e sistema, cual ta encera produci diferente tipo di lechuga y otro productonan den un espacio chikito. Despues a continua pa e di 2ndo compleho di e compania cual ta sistemannan hydroponico den “Greenhouse” situa na Yara, Savaneta. Esaki ta e Proyecto Hydroponico cu recien a cuminsa opera y aki tambe Sr. Fung A Fat a duna su splicacion extenso di e proyecto y su capacidad di produccion.
Na final di e recorido, a bishita e bunita projecto di wijndruif y “Chicken Farm” na Cunucu Aruba Dushi Tera cu ta situa na Alto Vista. Aki Sr. de Vries a wordo ricibi dor di Sr. Kock y su yiu kende a ofrece un guia den e cunuco. Sr. de Vries por a aprecia e plantacion di Caña y tambe su plantacion di druif pa traha Biña y Rum local. Sr. de Vries por a aprecia e area di proceso di preparacion y empake di e compania di webo local, Pok Pok Pok cu sigur ta otro producto cu tin un balor importante pa Sector Primario y disponibilidad di webo fresco pa nos consumo local. Lamentablemente e ora no tabata suficiente pa bishita mas proyecto pero Sr. de Vries a ricibi tur informacion di cua ta e otro proyecto nan cu ta logrando hopi exito den producion y te hasta expancion manera e ehempel di Cunucu Fresh.
“Sr. De Vries impresiona cu e desaroyo agrario na Aruba”
Na final di e dia, Sr. de Vries a disfruta di un lunch na Moomba Restaurant patrocina pa e gerencia di e restaurant. Sr. de Vries a keda sumamente impresiona cu e diferente desaroyonan tumando lugar na Aruba y a ofrece pa di su banda duna su cooperacion pa cualkier ayudo cu Aruba lo tin mester pa por asegura e progreso y exito den tur tres sector cu ta cay bou di e responsabilidad di DLVV Santa Rosa.
Pa medio di esaki, Santa Rosa kier gradici tur e productor nan pa coopera y nan tempo pa por a ricibi Sr. de Vries y nos ta spera cu den futuro nos lo por organisa mas bishita nan asina especialmente pa nos mandatarionan pa asina nan tambe lo por experencia pa nan mes e desaroyonan positivo cu ta tumando lugar den e Sector aki y cu porcierto tin ainda hopi mas potential pa wordo desaroya.
