E di 28 edicion di e Kinderboek festival 2020, cu ta hiba e tema, Tempo di mi tempo, ta tuma luga e aña aki na un manera virtual diabierna 30 di October atardi y por wak esaki na e canal di television 49.
E conexion cu esaki, sr. Richard Dabian, outor local, a presenta na Prome Minister Evelyn Wever-Croes su buki nobo cu e titulo ‘Tekki e toteki. Papiamento ta topa ku Papiamentu’ na Papiamento. E buki a wordo ilustra pa Gairo Tromp. Sr. Dabian a honra e tema di e aña aki y ta bay den historia cu dichonan di antes. Un buki pa conscientisa nos muchanan pa no perde ilusion pero sigui kere den nan mes pa logra nan metanan.
Prome Minister a gradici sr. Richard Dabian pa e aporte cu e ta duna na lesamento di buki pa nos muchanan y a keda hopi impresiona cu e mensahe positivo cu e buki ta contene.
Gobierno ta gradici tur esnan cu ta pone lesamento di buki un prioridad. A traves di lesamento di buki, un mundo nobo yen di aventura y conocemento ta habri pa nos muchanan. Tambe lesamento di buki ta inspira nos muchanan y lanta nan interes den studiamento. Den esaki, no ta solamente scolnan ta hunga un rol, pero tur mayor ta hunga un rol hopi grandi pa inspera e interes den nan yiunan pa lesa buki. Ban stimula nos muchanan pa lesa y pa asina habri un mundo di Aventura y conocemento pa nan”, Prome Minister Evelyn Wever-Croes a expresa.
