Ayera e integrantenan di Gabinete Wever-Croes II a keda anuncia. Den nan conferencia di prensa nos a scucha Sr. Ursell Arends, Lider di RAIZ, bisa cu esaki ta e gobierno cu Aruba a scoge. Ta importante pa aclarea cu esaki NO ta e gobierno cu pueblo di Aruba a scoge. 26,406 hende a vota pa oposicion ACCION21/MAS/AVP. 26,106 hende a vota pa coalicion MEP/RAIZ. 6,010 hende a vota pa e otro partidonan cu no a yega parlamento. Unicamente 44% di nos votadornan a scoge e gobierno entrante, un minoria.
Nos a tende Sra. Evelyn Wever-Croes, Lider di MEP, bisa cu e no lo defrauda confiansa di henter comunidad. E berdad ta cu ela hacie caba, pa prome biaha den nos historia nan lo inaugura un gobierno cu menos voto cu oposicion, un violacion di e boluntad democratico di nos pueblo. Segundo nan ta bay sinta cu 8 ministro lugar di 7, algo cu ta den interes di su partido pero no interes general. Esaki ta un ehempel clasico di politica tradicional, pone interes partidario prome cu bienestar di pueblo. Tur esaki apoya pa RAIZ, un partido cu a campaña fuertemente contra politica tradicional y a resulta peor cu nan.
Ta irresponsabel y inhustificabel bin cu un gabinete di ocho ministro na e momento mas financieramente precario di nos historia. Na un momento cu lo mester reduci gasto di gobierno, implementa austeridad y kita ambtenaar, segun Landspakket aproba pa Ministro Presidente Sra. Evelyn Wever-Croes cu Hulanda riba 13 di november 2020. Toch Gobierno MEP/RAIZ a haya adecuado sinta cu un ministerio mas costando pais Aruba miyones extra den gasto adicional.
Den e gabinete mes tin persona acusa di abuso di mucha, saca menor di edad na estado, malversion di placa, abuso di poder y nepotismo. Ta dificil kere cu esaki ta representa e mihor talentonan di pais Aruba. Sigur e gabinete entrante no ta refleha nos aspiracionnan pa futuro como nacion. Manera nos a señala den campaña, ta casi imposibel haya un miembro di Evelyn su famia cu no ta ariba payroll di gobierno of bibando di un contract di gobierno. E realidad aki ta conta pa varios otro ministro di su gabinete tambe. Ta improbabel cu esaki lo cambia apesar di nos Ministro di Integridad entrante.
Nos a tende Prome Ministro splica tocante procedura di con vacatura den gobierno ta wordo yena. Mescos cu screening, e adviesnan no ta binding dus ta e Ministro of Director(a) tin ultimo palabra y tin mas cu suficiente ehempel cu e fenomeno di friends & family ta y lo sigui.
Nos ta contento cu lo drenta dos Parlamentario nobo pa RAIZ. Mi ta spera cu nan si dicidi di honra nan votadornan y promesanan di campaña paso Ursell cu Geoffrey no a logra.
Apesar cu gobierno nobo ta laga hopi di desea, ta mi deber como parlamentario di purba keda traha constructivamente cu nan na bienestar di Pueblo Arubano y esey mi lo haci tambe. Especialmente cu Ministro di Finansas, ya cu e Presupuesto di Pais Aruba pa aña 2022 lo ta uno cu mester bay refleha tur e recortenan y medidanan cu Gabinete Wever-Croes I a acorda cu Hulanda. Tanto e Landspakket como COHO ta e resultado di mal gobernacion durante e ultimo 20 añanan y lamentablemente ta pueblo Arubano lo mester bay paga.