Splikashon relashoná ku medidanan di emergensia pa sigurá suministro di kombustibel.

KRALENDIJK, Bonaire

Na e momentunan aki pa loke ta trata suministro di koriente i awa di bebe Boneiru ta dependiente di Fuel Oil pisá (HFO) ku ta almasená na BOPEC. PDVSA, e kompania estatal di petroli di Venezuela ta doño di e petroli aki. Sanshonnan merikano ta prohibí pa hasi negoshi ku i hasi pagonan na PDVSA, a ménos si pidi lisensia pa hasi esaki. Aña pasá Curoil i Contour Global a pidi i haña e lisensianan aki pa por kumpra i paga HFO for di BOPEC. E lisensianan aktual ta kaduká dia 31 di mart 2020 i un prolongashon di esakinan no ta sigur. Pa motibu di e insiguridat aki e grupo di guia Kombustibel a disidí pa implementá dos medida di emergensia ku lo sigurá entrega adekuá di koriente i awa di bebe riba término korto. Ta trata di konkretamente dos medida di emergensia:

1. Konstruí un fasilidat di transbordo pa HFO riba tereno di BIA ku nan ta konektá ku un pipa di transporte pa bai e waf eksistente di aeropuerto. Almasenahe di HFO lo tuma lugá den dos ponton ku nan ta mara na e waf. Diariamente lo transportá e HFO ku trùk pa Contour Global Bonaire.

1. Banda di transbordo i transporte di HFO for di waf di aeropuerto a pidi Curoil pa hasi abastesimentu i almasenahe di disel komo kombustibel pa e planta di elektrisidat posibel. Ku introdukshon di e medidanan aki Boneiru lo no ta dependiente mas di almasenahe di kombustibel di PDVSA na BOPEC. 

Esaki ta enserá ku tur kos ta kla pará, pero ta e ora ku tin kestion di emergensia na momentu ku BOPEC stòp ku entrega di ‘fuel oil’ lo hasi uso di nan.

‘Nos no ta tuma ningun riesgo i nos no ta bai sinta warda te ora di bèrdat tin un problema grandi i a surgi inkietut i otro tipo di problema. Pasobra si tur lus paga i no tin produkshon di awa di bebe, e ora ei sí di bèrdat nos tin un problema i esei no por, nos no ke esei,’ asina gezaghebber Rijna a deklará. 

Pa e motibu ei e grupo di guia kombustibel ku ta bou di guia di gezaghebber Rijna a disidí ku ta prepará tur dos medida di emergensia, di manera ku mesora por hasi uso di nan. Ku esaki ta garantisá suministro di awa di bebe i koriente. Un suministro di energia ku ta funshoná bon ta di gran importansia sosial i ekonómiko pa Boneiru. P’esei ta trahando tambe riba solushonnan struktural ku lo sòru pa Boneiru no tin mester di resultá den e situashon aki mas. I ora esakinan ta kla, e medidanan di emergensia tampoko no ta nesesario mas.