Pa tin un investigacion tin indicacion di ireguralidadnan cu a tuma luga. Segun Prome Minister Evelyn Wever Croes, ex minister di infrastructura Marisol Tromp a constata cu tin un situacion den Seroe Colorado cu gobierno no ta na altura y no tin un registro di kende nan ta biba den Colony den e cas nan di gobierno.
Tin un registro boluntario cu a tuma luga y tin un bista awor aki, pero no ta na altura ta con e titulo aki a keda haci. Por tin diferente situacionnan porehempel contract di huur cu gobierno di erfpacht cu ta biba den dje.
Tambe ta na altura cu tin hende cu a drecha e cas na Colony pero e casnan no ta di nan, esey ta trece un situacion y complicacion di grado basta halto. Na momento cu ta huur un propiedad di un persona of un compania y abo como huurdo drecha esaki no necesariamente e balor agrega ta pa bo como huurdo.
Tambe tin un situacion cu ex minister Marisol Tromp a indica y enfoca riba dje cu tin empleadonan di DIP tin cas den Colony siendo cu e maneho di gobierno e tempo ey y ainda na momentonan aki cu si bo ta empleado di DIP bo tin menos oportunidad di haya tereno, cas ect, pero tambe si e trahado di DIP tin un cas caba e no lo por bin na remarca pa un otro tereno of cas di gobierno, esaki ta un maneho cu ta conta pa tur hende.
Na momento cu un persona tin un erfpacht caba y e kier un otro e no por haya esaki paso e erfpacht ta reserva pa personanan cu no tin tereno y no tin cas di gobierno. Tambe prome minister Evelyn Wever Croes a indica cu tin algun aspecto interno cu ta keda repasa y revisa.
E investigacion actual den Colony ta den fase final y ta spera cu por haya esaki pa mira realmente kico ta e situacion y kico tur a pasa cu e situacion den Colony. Tin un compania forensico cu ta haciendo e trabao di investigacion di e casnan di Colony y gobierno ta spera di haya e resultado di e investigacion aki.
Tambe ta consciente cu no ta tur ora por haya un si, pero eventualmente tur persona mester por haya un contesta por lo menos. Na mes momento prome minister Evelyn Wever Croes a indica cu na momento cu ricibi e rapport di investigacion di Colony lo actua abase di e recomendacionnan cu ricibi.